San Xoán de Calo: cinco días de troula con París de Noia, Olympus e a “Festa do Colesterol”

Do 22 ao 26 de xuño, a parroquia de Calo, no concello de Teo, converterase nun punto neurálxico da festa galega coa celebración das tradicionais Festas de San Xoán. A programación deste ano inclúe novidades como a “Primeira Festa do Colesterol”, a tradicional queima da cabra vella e unha destacada lista de actuacións musicais encabezadas por París de Noia, Olympus, Tania Veiras ou DJ Sonic. A entrevista con Borja Otero en Radio Líder Santiago revelou non só o cartel senón tamén o esforzo humano que hai detrás.

“Traballamos todo o ano. Cando remata unha festa, xa comezamos coa seguinte”, confesou Otero. A implicación veciñal é clave: “Na comisión somos poucos, pero temos moita xente que colabora. Sen a xente isto non sería posible”. O financiamento vén da venda de rifas, lotarías e achegas das casas e empresas locais. “Hai máis de cen empresas colaboradoras. Sen elas, isto non se podería facer”, explicou mentres amosaba o libro das festas.

O domingo 22 abrirá a programación cunha sesión vermú e a peculiar “Festa do Colesterol”, con patacas, ovos e chourizo frito. O 23 celebrarase a noite máis máxica coa sardiñada popular e queima da cabra vella. O día 24 destaca pola actuación de Tania Veiras e a orquestra Finisterre, e o 25 traerá ao escenario a orquestra Olympus e DJ Sony. Para pechar, o xoves 26, actuarán MegaCDC con Martín Díaz e París de Noia.

Borja tamén fixo un chamamento á responsabilidade: “Temos radiotaxi dispoñible. Se tomas unha ou dúas copas, é mellor coller un taxi. Queremos festas seguras para todos”. A previsión meteorolóxica, di, “vai ser boa, non vai chover”. E engade, con orgullo: “Estas festas son historia viva do pobo”.