Estrella Galicia e Aluminios Cotizo, entre os grandes protagonistas dos Premios Industria e Enerxía 2026

• • O decano do Colexio Oficial de Enxeñeiros Industriais de Galicia, Julio García, destaca a necesidade de impulsar unha reindustrialización sostible e reivindica o papel estratéxico do sector durante a presentación da Gala da Industria e a Enerxía de Galicia 2026
  • Galicia premia a excelencia industrial e enerxética cunha gala que reivindica o futuro do sector

Santiago de Compostela acolle este venres ás 20:00 horas no Auditorio Abanca unha nova edición da Gala da Industria e a Enerxía de Galicia, un encontro que se consolidou como unha das grandes citas anuais para o tecido produtivo galego. Organizada polo Colexio Oficial de Enxeñeiros Industriais de Galicia e a Asociación de Enxeñeiros Industriais de Galicia, a cerimonia recoñecerá a empresas, proxectos e profesionais que destacan pola súa contribución á innovación, a sostibilidade e o desenvolvemento industrial da comunidade.

Durante unha entrevista concedida horas antes do evento, o decano do Colexio e presidente da Asociación, Julio García Cordonié, puxo o acento na necesidade de seguir fortalecendo o sector como motor económico. «Nós apostamos desde hai moito tempo pola necesidade de acometer unha reindustrialización, porque a industria ten que ser unha base importante do noso desenvolvemento económico», afirmou.

García subliñou que ese crecemento debe adaptarse aos novos tempos e avanzar cara a un modelo máis respectuoso co entorno. «Ten que ser unha reindustrialización verde, dixitalizada e sostible», sinalou, destacando ademais que Galicia sitúase lixeiramente por enriba da media nacional en peso industrial sobre o PIB, aínda que aínda lonxe do obxectivo europeo de acadar o 20%.

A gala, que este ano se celebra no Auditorio ABANCA de Santiago, reunirá a representantes empresariais, profesionais do sector e autoridades institucionais. O decano explicou que o formato xa está plenamente consolidado tras a unificación dos antigos premios de Industria e Enerxía.

«O que facemos é poñer en valor a actividade industrial e enerxética de Galicia e premiar actuacións destacadas que contribúen ao progreso da nosa comunidade», indicou.

Durante o acto entregaranse os Premios de Industria e Enerxía de Galicia 2026, cuxos máximos recoñecementos recaeron en Estrella Galicia, pola súa nova fábrica en Arteixo; Voltfer, por un proxecto de autoconsumo fotovoltaico industrial en Porriño; Aluminios Cortizo, polo seu Campus Tecnolóxico de Padrón; XEAL, pola modernización da Central Hidroeléctrica de Fervenza; e Litosoil, polo seu innovador sistema de valorización de solos contaminados.

Así mesmo, recoñecerase a traxectoria profesional de José Luis Alonso Mosquera, director de Stellantis Vigo, e entregaranse os Premios de Seguridade Industrial á Axencia de Turismo de Galicia e a Talleres Marcos Gómez, S.L.

Máis alá dos premios, o responsable do Colexio insistiu en que a gala tamén serve para trasladar un mensaxe ao conxunto da sociedade. «Queremos poñer en valor a importancia que ten a industria e a enerxía para o desenvolvemento económico e para o benestar da nosa sociedade», afirmou.

Así mesmo, reivindicou o papel da enxeñaría industrial nese proceso de transformación. «Queremos poñer en valor a nosa profesión e a contribución dos enxeñeiros industriais ao desenvolvemento tecnolóxico, industrial, económico e ao benestar da nosa sociedade», concluíu.

A gala contará coa participación de destacados representantes institucionais, entre eles o propio Julio García Cordonié, o secretario xeral de Industria e Desenvolvemento Enerxético da Xunta de Galicia, Nicolás Vázquez Iglesias; a directora xeral de Estratexia Industrial e Solo Empresarial, Margarita Ardao Rodríguez; o delegado do Goberno en Galicia, Pedro Blanco Lobeiras; representantes da Deputación da Coruña, así como responsables do ICOIIG e a AIIG, como Rocío Lourenco Presa, delegada do ICOIIG en Santiago, xunto a directivos das empresas galardoadas e representantes do tecido industrial e enerxético galego.