«O comercio ten que estar no centro da cidade, non en polígonos nas aforas»

Nunha entrevista este martes en Radio Líder Santiago, a alcaldesa de Santiago de Compostela, Goretti Sanmartín, compartiu un balance positivo do verán, destacando a gran afluencia de turistas. A campaña informativa para concienciar sobre o coidado do patrimonio e a convivencia foi clave nun período de alta ocupación, con especial fincapé en garantir o respecto polo descanso dos veciños. “Queremos que Santiago siga sendo un lugar atractivo tanto para vivir como para visitar”, afirmou.

Un dos temas máis destacados foi a taxa turística, cuxa implantación depende agora da Xunta de Galicia. Sanmartín expresou o seu desexo de que esta medida, xa aplicada en diversas cidades europeas, entre en vigor pronto. “É un clamor social en Santiago de Compostela”, sinalou.

Por outra banda, o Concello puxo en marcha un plan de control tributario tras 24 anos sen aplicarse. Este programa busca asegurar que todos os contribuíntes, en equidade, paguen os impostos que lles corresponden, o que permitirá mellorar os servizos públicos da cidade.

Sanmartín tamén subliñou a importancia da participación cidadá, mencionando a reactivación do Consello de Igualdade, que non se reunía desde 2011. Nesta liña, o goberno municipal abriu varios espazos de diálogo coa poboación, onde diferentes asociacións veciñais, culturais e feministas puideron expresar as súas propostas e inquedanzas.

En canto ao comercio local, a alcaldesa recoñeceu a crecente dificultade que afrontan os comerciantes debido ao auxe das vendas en liña e á competencia dos polígonos comerciais nas aforas, lonxe de ser espazos industriais. “Queremos que Santiago sexa visto como unha capital de compras, onde se aposte polo comercio de proximidade”, e enagadiu que «o comercio ten que estar na zona centro da cidade, non en polígonos nas aforas».

Por último, abordáronse os plans de mobilidade e urbanismo. Entre os proxectos en marcha, destaca un concurso de ideas para reestruturar o conector central da cidade e a licitación do novo contrato de transporte público, enfocado en mellorar a mobilidade e a calidade de vida dos cidadáns.

A entrevista completa no seguinte enlace.