Medrar en poboación e en empresas, os retos do novo goberno de Rianxo

Bustelo chegaba a coller o bastón de mando tras ser o candidato de Rianxo en Común, a forza máis votada nas pasadas eleccións conseguindo 5 concelleiros, o mesmo número de edís que o PSOE e o PP, xunto aos dous logrados polo BNG.

Tras un periodo de goberno en coalición entre o PSOE e o BNG, o novo alcalde afronta a xestión municipal en minoría e cun equipo de goberno de tan só cinco persoas. Explica que «con cinco concelleiros trabállase ben, pero hai que traballar máis» xa que «temos no noso ADN o diálogo como forma de entender a política».

Do seu primeiro ano como alcalde recoñece o esforzo administrativo importante para licitar e executar obras por 1,3 millóns de euros, principalmente de abastecemento e saneamento en moitos núcleos do municipio, así como o arranxo en distintas pistas. Menciona o problema engadido de «poñer en orde as contas municipais, xa que cando entramos tíñamos unha débeda comercial duns 2,5 millóns e que con moito esforzo logramos rebaixala á metade».

A vindeira semana elebarase a pleno a aprobación duns Orzamentos municipais de preto de 9,3 millóns, unhas contas que medran un 22 % con respecto aos actuais, prorrogados dende o ano 2021. A aprobación destes Orzamentos son «fundamentais» para botar a andar as iniciativas e proxectos do seu programa electoral, o cal remarcaba dez puntos esencias para o presente e futuro dos 10.800 veciños e veciñas de Rianxo.

Neste senso, Bustelo lamenta o descenso notable de poboación que vive o municipio nos últimos anos, algo que tentará de reverter cunha serie de programas e iniciativas que axuden a que os cidadáns atopen en Rianxo aqueles servizos que antes non atopaban, e que, en moitos casos, fixeron que moitas persoas mudaran de residencia a outro concello que sí llos ofrecía. Bustelo equipara esta situación coa que vive o comercio local, cun preocupante peche de negocios. Este dous aspectos, son sen dúbida, onde o novo equipo de goberno porá todo o seu esforzo para converter a Rianxo nun concello atraente para vivir e inverter, e non todo o contrario como ata o de agora. Eso sí, deixa claro que nos seus plans de futuro non está o fusionarse con outro concello limítrofe, como método para cortar de raíz a despoboación.

Finalmente o rexedor non esconde que para que o Concello de Rianxo, ou calquera outro de Galicia, continúe medrando e mellorando a calidade de vida dos seus cidadáns é preciso da colaboración entre administracións, como a que existe coa Deputación e, en menor medida, coa Xunta. Tamén descata o papel da Mancomunicade do Barbanza e Arousa onde se comparten moitas sinerxias, a gran maioría en Turismo, pero coa participación de alcaldes todos eles de distinta cor política.

Tes a entrevista completa no seguinte enlace.