Homenaxe ás primeiras mulleres da banda de Santa Cruz de Ribadulla: «Fixemos historia sen sabelo»

O Concello de Vedra volve conmemorar o 8M cunha programación que vai máis alá do propio Día Internacional da Muller. «Levamos anos organizando actos que van dende o recoñecemento público ata actividades de sensibilización, porque a loita pola igualdade ten que ser constante», explicou a concelleira de Servizos Sociais, Muller e Igualdade, Susana García Lema.

Este ano, unha das homenaxes máis destacadas é a que se renderá ás mulleres da banda de música de Santa Cruz de Ribadulla, que en poucos anos cumprirá un século de historia. Irene Rodríguez Ferradans, unha das primeiras mulleres en formar parte da agrupación nos anos 90, expresou o seu orgullo por este recoñecemento: «Nunca pensamos que estabamos facendo historia, entramos como un grupo máis de nenos e nenas, pero agora miramos atrás e decatámonos de que fomos as primeiras».

A homenaxe terá lugar o propio 8 de marzo, ás 12:00 horas, no Centro Sociocultural de Vedra, logo da tradicional plantación dunha camelia en honor ás mulleres recoñecidas. «A camelia é un símbolo de Vedra, e queremos que cada homenaxe quede representado no noso patrimonio natural», apuntou García Lema.

A homenaxe ás integrantes da banda é unha máis das moitas iniciativas que o Concello de Vedra leva a cabo para destacar o papel das mulleres. «Cada ano recoñecemos a mulleres que abriron camiño en distintos ámbitos: política, voluntariado, vida social e cultural… Este ano, tocoulle ás mulleres da banda, pero seguimos visibilizando historias», engadiu a concelleira.

No marco da campaña «Facemos historia todos os días», o concello publica diariamente testemuños de mulleres vedresas en distintos ámbitos profesionais e sociais. «Queremos que as novas xeracións teñan referentes femininos próximos e reais», subliñou.

Un programa para toda a cidadanía

Ademais do acto institucional e da homenaxe, o Concello de Vedra organiza outras actividades para sensibilizar á poboación sobre a igualdade de xénero. Entre elas destacan:

• Andaina «Camiño da Igualdade» (16 de marzo), cun percorrido de 12 quilómetros dende Santa Cruz de Ribadulla ata Sucira. «As prazas esgotáronse rapidísimo, é unha actividade que sempre ten moito éxito», sinalou a concelleira.
• Xincana en familia, para fomentar a igualdade no fogar a través do xogo.
• Talleres sobre os puntos violeta, que forman a voluntariado para detectar e actuar ante situacións de violencia de xénero.

«Queremos que toda a sociedade participe, dende os máis pequenos ata os máis maiores. A igualdade constrúese día a día e en todos os espazos», asegurou García Lema.

Un 8M de reivindicación e alerta ante o retroceso na mocidade

Malia os avances conseguidos, a preocupación polo retroceso nos valores da mocidade é unha realidade que tamén se puxo sobre a mesa durante a entrevista. «Estamos vendo condutas preocupantes nos máis novos. Hai rapaces que consideran que controlar a súa parella é unha mostra de amor, e iso é algo que temos que combater dende a educación», alertou a concelleira.

Irene Rodríguez Ferradans, que é mestra de educación física en primaria, tamén coincide en que certos comportamentos machistas seguen presentes: «Ás veces escoitas comentarios de nenos moi pequenos e pregúntaste de onde veñen esas ideas. As redes sociais teñen moita influencia, e os contidos que consumen non sempre promoven valores igualitarios».

Por iso, no Concello de Vedra tamén se aposta por iniciativas de sensibilización en centros educativos. «A escola é clave, pero tamén o é a educación no fogar. A igualdade ten que empezar nas casas», concluíu García Lema.

Ademais da área de igualdade, a concelleira tamén destacou o papel dos servizos sociais no concello. «A maior parte dos recursos municipais destínanse a servizos sociais, porque hai moita xente que precisa apoio», afirmou. A través do Servizo de Atención no Fogar (SAF), do voluntariado e da atención a situacións de emerxencia, o concello traballa para garantir o benestar da súa cidadanía.

No ámbito da violencia de xénero, o Centro de Información á Muller (CIM) segue sendo un recurso clave para ofrecer asesoramento legal, psicolóxico e social ás mulleres en situación de vulnerabilidade. «Temos un equipo magnífico con educadoras sociais, avogadas e psicólogas, e sempre insistimos en que calquera muller que precise axuda pode acudir a nós», destacou García Lema.

O Concello de Vedra continúa así coa súa aposta firme pola igualdade de xénero, combinando recoñecemento, educación e sensibilización. «O 8M é unha data necesaria, pero o compromiso coa igualdade ten que ser diario», afirmou García Lema.

A homenaxe ás mulleres da banda de música de Santa Cruz de Ribadulla é unha mostra máis de como a historia se constrúe día a día, con pequenos pero importantes avances. Como di Irene Rodríguez Ferradans: «Fixemos historia sen sabelo, e oxalá as nenas de hoxe non teñan que preguntarse se poden ou non poden estar nun determinado espazo. O mundo é de todos e de todas».

A entrevista completa, no seguinte enlace.