Gonzalo Muíños propón un Pacto Local pola Convivencia e a Seguridade

Santiago de Compostela, 24 de febreiro de 2025. O portavoz do grupo socialista en Raxoi, Gonzalo Muíños, apelou este luns á necesidade dunha resposta coordinada e consensuada entre todas as forzas políticas para mellorar a seguridade na cidade. Con este obxectivo, os socialistas levarán ao vindeiro pleno unha proposta para a elaboración dun Pacto Local pola Seguridade e a Convivencia.

Muíños subliñou que é fundamental alcanzar un acordo que permita mellorar a calidade de vida da veciñanza de Compostela a través do diálogo e do consenso. «Hai aspectos na política que requiren altura de miras e capacidade de entendemento», afirmou.

Un plan en tres fases

A iniciativa socialista estrutúrase en tres fases:

1. Convocatoria urxente da Xunta Local de Seguridade, co obxectivo de analizar a situación actual e establecer accións inmediatas para afrontar os problemas de convivencia detectados en zonas como Santa Marta, a Choupana, o Ensanche e Vidán.
2. Xunta extraordinaria de portavoces, na que se trasladarán os acordos acadados na Xunta Local de Seguridade e se sentarán as bases para a elaboración do pacto.
3. Creación dunha Comisión Permanente para a Seguridade e a Convivencia, con reunións trimestrais, integrada por persoal técnico de distintas áreas municipais (Benestar Social, Seguridade, Igualdade, Servizos Básicos…), representantes dos Corpos e Forzas de Seguridade, axentes sociais, plataformas veciñais e membros da Corporación Municipal.

Ademais, a primeira acción concreta sería unha reunión inicial cunha representación da Plataforma Santa Marta Segura e doutras entidades veciñais que o soliciten, para que todas as voces implicadas poidan achegar propostas e solucións.

Un pacto con compromiso e seguimento

A proposta socialista culminaría na elaboración e sinatura dun Pacto Local pola Seguridade e a Convivencia, un documento marco con propostas concretas acordadas entre todas as forzas políticas, cuxo cumprimento sería supervisado a través das reunións periódicas da comisión correspondente.

Muíños advertiu que, segundo os datos dispoñibles, a taxa de delincuencia en Santiago aumentou un 3,5% no ano 2024. «Trátase dun incremento moderado que non debe xerar alarmismo, pero si levarnos a actuar antes de que a situación se agrave», concluíu.