Gonzalo Louzao: “Hai 3.000 vivendas baleiras na Estrada e imos darlles uso”

Louzao herda o liderado de José López Campos, anterior alcalde, a quen define como “un gran referente”. Apostou por un equipo que mestura veteranía e renovación, e que puxo en marcha accións concretas desde o primeiro día. “A maioría da veciñanza avalou coa súa confianza o noso proxecto político. Tiñamos que seguir traballando con velocidade de cruceiro”, afirmou.

Un dos logros que máis salientou o alcalde é o saneamento das contas municipais. O Concello recuperou en 2024 arredor de oito millóns de euros en axudas europeas pendentes de cobro, o que lle permitiu reducir a débeda a 1,4 millóns de euros e recuperar capacidade de investimento. “Como calquera economía doméstica, se tes débeda non podes planificar nin avanzar”, explicou. Agora, asegura que o Concello ten “boa saúde financeira”.

A vertebración do territorio é unha das grandes obsesións do alcalde. O Concello ten 2.500 km de pistas, e aínda que moitas foron melloradas, quedan moitas por arranxar. “Este ano investiremos máis de dous millóns de euros no asfaltado. É un paso histórico, pero sabemos que non é suficiente”, recoñeceu.

Louzao anunciou unha discriminación positiva para o rural, co obxectivo de que cada parroquia, cada núcleo dos 473 existentes, vexa mellorada a súa rede viaria e servizos públicos.

Outro dos retos estruturais é o acceso á vivenda. O Concello identificou 3.000 vivendas baleiras no seu territorio e busca incentivalas con bonificacións fiscais. “Queremos bonificar ata o 50% do IBI a quen poña no mercado vivendas baleiras. Hai que activar ese patrimonio e convertelo en oportunidades para novas familias”, explicou.

Ao tempo, en colaboración coa Xunta de Galicia, tramítase a construción de 28 vivendas públicas nunha parcela municipal xa cedida.

Despois de máis de dúas décadas sen dispoñer de solo industrial público, a Estrada está en vías de solucionar esta eiva. “O polígono vai moi ben. Moitas empresas de dentro e de fóra chaman interesándose”, asegurou.

O obxectivo é crear un espazo que permita ampliar empresas existentes e atraer novos proxectos industriais. A situación xeográfica do municipio, preto de Santiago, converte a Estrada nun enclave estratéxico.

“Atendo veciños os 365 días do ano”

Louzao mantén unha política de portas abertas. Atende presencial e telefónicamente a calquera hora, algo que herdou do seu antecesor. Ademais, percorre os núcleos de poboación con regularidade para coñecer de primeira man as demandas. “Somos coma os camareiros dun restaurante, pero os que están na cociña son os traballadores do Concello”, dixo en agradecemento ao persoal municipal.

Preocúpalle o envellecemento da poboación e quere atraer xente nova para residir, traballar e formar familia na Estrada. Fala con paixón dun modelo de municipio con servizos, infraestruturas e oportunidades. “Non quero que a Estrada sexa só unha vila ben comunicada. Quero que haxa oportunidades reais para que a xente se quede”, destacou.

O alcalde destacou os investimentos en instalacións deportivas, como a nova pista de atletismo ou o módulo multideporte cuberto en construción. “Máis de mil persoas practican deporte federado cada día. Queremos darlles as mellores instalacións posibles”, comentou.

Tamén anunciou unha programación cultural ambiciosa para os próximos meses, incluíndo a Festa do Salmón (18 de maio), a Feira da Sidra (7 de xuño) e a Rapa das Bestas de Sabucedo (xullo), así como artistas nacionais e internacionais.

Con só 30 anos, Gonzalo Louzao amosa madurez, paixón e compromiso co seu cargo. Di que non se marca un límite temporal para estar na alcaldía, pero só se os veciños o consideran útil. “O tempo que dedico ao Concello non se recupera, así que ten que valer a pena. Quero que ese tempo se note na vida da xente”, sentenciou.

Gonzalo Louzao afronta o seu segundo ano á fronte da Estrada cun goberno sólido, contas saneadas e proxectos ambiciosos. A súa mensaxe é clara: gobernar coa xente, desde o territorio e coa mirada posta no futuro. Un futuro onde o rural, a vivenda, o emprego e os servizos son as claves para facer da Estrada unha vila orgullosa dos seus e aberta ao mundo.

A entrevista completa, no seguinte enlace.