Doval celebra a concentración histórica en Oroso tras 34 anos: «O monte ordenado non arde»
O alcalde de Oroso fai balance da metade da lexislatura con proxectos históricos como a concentración parcelaria, obras de humanización en Sigüeiro, aposta pola AP-9 gratuita e unha explosión de dinamismo no comercio local.
Líder Redacción
1 de agosto de 2025 a las 19:11
No ecuador da lexislatura, o alcalde de Oroso, Álex Doval, debullou en Radio Líder Santiago os avances dun mandato que cualifica como “intenso, produtivo e transformador”. En conversación con Álvaro Veiga, repasou unha longa listaxe de actuacións xa realizadas, en marcha ou en fase de licitación, sen agochar os atrancos e desafíos dun Concello que, segundo di, “non para de medrar en todos os sentidos”.
34 anos de espera: concentración parcelaria histórica
Un dos fitos máis simbólicos foi a finalización da concentración parcelaria nas parroquias máis afastadas do núcleo urbano. “Levabamos 34 anos agardando este momento. Cando comezou ese proceso, eu tiña un ano”, explicou con ironía. A reestruturación afectou a case 900 propietarios, pasando de máis de 7.000 fincas a 1.400. “Poucos concellos poden dicir que teñen todo o territorio concentrado, tanto monte como labradío”.
Para Doval, o impacto vai moito máis alá da organización territorial: “O monte ordenado e produtivo non arde. Cando tes que sacar rendemento, prestas atención; o abandono é o que o fai perigoso”.
O núcleo urbano está en plena transformación. A remodelación da praza Isaac Díaz Pardo supón unha das obras estrela, cun investimento de 700.000 euros cofinanciados entre Concello e Xunta. “É o corazón da vila. Por fin teremos unha praza digna para eventos e encontro cidadán”, asegurou o rexedor, ao tempo que pediu desculpas polas molestias: “As obras molestan, pero son necesarias. É como reformar unha casa”.
Ademais, ampliáronse as beirarrúas na Avenida Compostela (60.000€) e executáronse melloras no Parque da Ulloa (40.000€), sen esquecer outras actuacións no Portiño, Vilacide, San Tomé, Berdomás ou o polideportivo municipal. En total, as obras en execución ou licitación superan o millón de euros.
“Cada proxecto, grande ou pequeno, é importante. Desde a tarima dun local de maiores ata o tapete do campo de fútbol. Todo suma nun Concello activo e mellor preparado para o futuro”, sinalou.
Mobilidade e AP-9: “Facer unha infraestrutura nova por 32 millóns non ten sentido”
Un dos temas que máis paixón esperta no alcalde é a reivindicación da gratuidade do tramo da AP-9 entre Sigüeiro e Santiago. “A solución aos atascos non é construír unha nova circunvalación que custa 32 millóns e divide Oroso pola metade. Temos a AP-9. Só pedimos que sexa gratuita, como en moitos outros lugares”, declarou.
Doval forma parte activa dunha plataforma de alcaldes que reclaman esta medida: “Temos que deixar de inventar novas asociacións. Xa temos unha. Todos os partidos están representados e debemos loitar xuntos”.
A súa indignación recente viuse reflectida nun episodio de obras non comunicadas na nacional: “Chegar ao Concello un luns e ver que cortaron rúas e eliminaron prazas de aparcamento sen avisar é inadmisible. Non se nos tivo en conta nin para coordinar o tráfico. Unha falta de respecto institucional”.
Outro dos piares do mandato é o fortalecemento do irmandamento con Góis, en Portugal. “Pasamos do simbólico ao efectivo. Intercambio de nenos, actividades culturais, deporte… Mandamos rapaces ao Góis Cup e gañaron”, contou con entusiasmo. “Queremos que o hermanamento sexa entre veciños, non só entre alcaldes que se dan a man”.
O enfoque interxeracional tamén se deixa notar: “Escollimos traballar cos nenos porque cos maiores é máis complexo, pero non esquecemos a ninguén. Os pais agradecen que os cativos vivan unha experiencia internacional e eles tamén descansan”, bromeou.
O rexedor tamén celebrou o bo momento do tecido comercial local: “Hai aperturas constantes de bares, comercios… Un ambiente que non había hai anos. Agora un sábado á noite ves terrazas cheas e xente pola rúa. Iso é saúde urbana”. Promete seguir facilitando ao máximo os trámites para quen queira emprender: “Se non podemos axudar, polo menos non incordiar. Os autónomos merecen todo o noso respecto”.
2026 xa se está cociñando: “Queremos o orzamento aprobado en novembro”
A previsión é outra das obsesións do alcalde. “Xa estamos traballando nos orzamentos de 2026. O obxectivo é telos aprobados no pleno de novembro”, anunciou. Este avance será clave para executar un novo proxecto urbanístico valorado en preto dun millón de euros, do que non quixo dar detalles: “Temos todos os permisos. Falaremos máis a fondo despois do verán”.
“Levamos feito moito e queda moito por facer”, concluíu Doval, comprometéndose a seguir con intensidade o que resta de lexislatura. “Non hai vacacións cando un quere deixar pegada. Oroso está vivo, e iso nótase en cada rúa, en cada praza e en cada novo proxecto que nace”.
