«Ao non poder atacarnos polo traballo, a oposición recorre a descalificacións persoais desde perfís falsos»

• O alcalde Anxo Arca e a concelleira Chus Campos repasaron en Radio Líder Santiago a axenda municipal, o turismo e a vida política marcada pola tensión en redes sociais

• O executivo padronés anuncia investimentos en infraestruturas, novidades culturais e prepara un Nadal “con sorpresas importantes”

O alcalde de Padrón, Anxo Arca, e a concelleira de Turismo e Festas, Chus Campos, foron entrevistados por Álvaro Veiga en Radio Líder Santiago, nunha conversa ampla sobre o presente e futuro do municipio. O rexedor fixo balance do verán e sinalou que o goberno local está inmerso nunha intensa actividade. “Este goberno non para, non paramos en agosto, non paramos en setembro… o importante é que Padrón continúe tendo mellores instalacións e mellor calidade de vida”, afirmou.

Entre os proxectos destacados atópanse a nova ruta das pesqueiras de 18 km, pensada para poñer en valor o patrimonio ligado á lamprea e ao río Ulla; a pavimentación de vías municipais; o pumptrack do Paseo da Constitución; a mellora do campo de fútbol de Estramundi; e novos parques infantís en diferentes rúas. Arca subliñou que a prioridade é “poñer ao día unhas infraestruturas municipais moi esgotadas, antes de emprender novos retos”.

Un dos temas máis sensibles foi o do Centro de Saúde, cuxa reforma será asumida ao 50% entre Concello e Xunta. “Non era a opción máis axeitada, porque fai que os padroneses paguen o dobre por ter unha sanidade decente”, criticou o alcalde, lembrando que a proposta inicial era que a Consellería asumise todo o investimento.

No ámbito turístico, Chus Campos destacou a crecente afluencia de peregrinos e visitantes. “Só hai que dar unha volta por Padrón calquera tarde para ver as terrazas cheas e os negocios a funcionar”. Ademais, anunciou a programación do Outono cultural, cun ciclo de cinema en tres espazos —incluíndo a Casa de Rosalía—, no que se proxectará, entre outros títulos, un filme sobre Castelao.

A edil de Turismo e Festas, Chus Campos, dedicou unha parte da entrevista a denunciar os ataques machistas sufridos nas últimas semanas en redes sociais, procedentes de perfís anónimos. Estes comentarios, explicou, criticábanlle a súa vestimenta deportiva durante a práctica do ciclismo, cuestionando que utilizase a equipación do histórico equipo Cortizo, un club de referencia en Galicia con máis de setenta anos de traxectoria. Campos rexeitou con firmeza estas actitudes: “Preocúpame a imaxe que iso dá ás rapazas que queren practicar ciclismo ou ir ao ximnasio. Non podemos permitir que se lles marque como deben vestir”. A concelleira recalcou que a mensaxe que transmiten estes ataques é perigosa porque pode disuadir ás máis novas de iniciarse no deporte, fomentando estereotipos que non teñen cabida nunha sociedade igualitaria.

A edil asegurou que seguirá lucindo con orgullo o maillot do Cortizo, subliñando que non só ela o fai, senón tamén numerosos veciños e veciñas que visten a equipación do club como sinal de apoio. “É un orgullo que en Padrón teñamos un equipo de referencia a nivel galego e estatal, que leva o nome do noso pobo por toda España e que forma a xeracións de ciclistas profesionais”, apuntou. Trala polémica, o propio equipo Cortizo saíu ao paso e desmentiu categóricamente as insinuacións vertidas nas redes, reafirmando o seu respaldo á edil e á comunidade que se identifica co club.

Ademais, Campos destacou a inmensa “oleada de apoio” recibida tanto a nivel local como autonómico e estatal: veciños e veciñas de Padrón, representantes políticos de diferentes cores, alcaldes, alcaldesas e concelleiros de toda Galicia, ademais de deportistas, expresaron o seu rexeitamento á campaña de difamación. “Sentímonos abraiados coa solidariedade que nos chegou de todas partes. O pobo de Padrón deixou claro que non comparte este tipo de actitudes e que quere unha política construtiva, non baseada na mentira nin na descalificación persoal”, concluíu.

En materia política, o alcalde confirmou que os orzamentos municipais entraron en vigor a finais de agosto, tras unha cuestión de confianza. Criticou a actitude da oposición e os ataques en redes: “Cando nós estabamos na oposición eramos críticos, pero sempre con cortesía e dando a cara. Como a oposición non pode atacarnos polo traballo, o fan con descalificacións persoais dende perfís falsos», lamenta.

O rexedor tamén falou do irmanamento con Arjonilla (Jaén), que se plasmará nunha viaxe a finais de mes coincidindo coas xornadas medievais desta localidade. Arca subliñou que esta unión completa “un círculo de irmandamentos con coherencia”, xunto a Rianxo, Santiago e outras localidades galegas. Tamén puxo en valor o contacto fluído co Concello de Santiago para afrontar o reto común da xestión do éxito turístico: “Temos que buscar un equilibrio entre a calidade de vida da veciñanza e a calidade da experiencia dos visitantes”.

No plano cultural e festivo, Campos avanzou que o Nadal padronés traerá unha novidade importante que aínda non se desvelou, pero que “vai marcar a diferenza e fará desfrutar moito aos nenos e nenas”. O goberno local xa traballa tamén na organización do Entroido e da Pascua, tras o éxito de participación acadado en edicións anteriores.

Arca concluíu reiterando a aposta pola proximidade: “Queremos un goberno presente no terreo, preto da cidadanía, e informando con transparencia do que facemos”.