Ana Pontón, Noa Presas e Gustavo Barcia buscarán liderar o BNG na súa XVIII Asemblea Nacional
Santiago de Compostela, 21 novembro 2024.- O BNG pecha o proceso preasembleario coa presentación de tres candidaturas á XVIII Asemblea Nacional que terá lugar o vindeiro 1 de decembro en Santiago de Compostela, cita coa militancia que se celebra coincidindo co seu mellor momento social e electoral. As tres candidaturas presentadas están encabezadas por Ana Pontón, actual portavoz nacional; Noa Presas, deputada no Parlamento galego; e Gustavo Barcia, portavoz municipal no Concello de Mos.
Líder Redacción
21 de noviembre de 2024 a las 13:46
O Bloque chega a esta XVIII Asemblea Nacional, que leva por lema Coa túa forza Galiza gaña, logo dun debate participativo ao longo de todas as comarcas do País e na diáspora sobre o rumbo político, estratéxico e organizativo a desenvolver nos próximos anos, que será definido o 1 de decembro na cita asemblearia.
Así pois, a formación nacionalista debaterá e aprobará as grandes liñas que marcarán o seu proxecto de futuro co obxectivo de seguir ampliando a súa base social para liderar en 2027 a transformación dos concellos e en 2028 o Goberno galego.
Neste sentido, a organización mostra o seu convencemento de que mantendo a liña política seguida nos últimos anos, baseada en facilitar respostas e alternativas aos problemas da xente no seu día a día e na defensa dos intereses e do futuro do País, o BNG non ten ningún límite e pode chegar a electorados de moi diferente natureza.
Por iso, coa nova etapa que comezará despois da asemblea, a formación nacionalista reafirmará o seu compromiso de seguir estando á altura de todas as esperanzas e de todas as ilusións que foi capaz de xerar na sociedade galega.
