A Plataforma contra a planta de residuos en Cacheiras reclama ao Concello unha posición firme

A sesión estivo marcada tamén pola mobilización veciñal que se desenvolveu no exterior do Concello, onde numerosas veciñas e veciños da zona afectada se concentraron para facer visible o seu rexeitamento ao proxecto. Durante a protesta, as persoas participantes levaron máscaras mentres se reproducía o son de maquinaria machacadora e se emitía fume simbólico, nunha acción coa que quixeron trasladar ao goberno municipal unha imaxe realista do impacto que, segundo denuncian, tería a instalación desta planta ao carón das súas vivendas.

A entidade veciñal, que representa a residentes da contorna afectada de Cacheiras, defendeu no pleno o dereito da veciñanza a vivir nun entorno saudable, tranquilo e compatible coa vida no rural, e advertiu das consecuencias que esta infraestrutura podería ter sobre a calidade de vida da zona.

Desde a Plataforma subliñan que non se opoñen á xestión de residuos nin á reciclaxe, pero consideran “inadecuado” o emprazamento elixido, ao tratarse dunha zona habitada e integrada nun espazo rural que, segundo indican, “non debería verse alterado por unha actividade industrial destas características”.

A instalación proxectada, cunha capacidade máxima de 25.000 toneladas anuais, implicaría –segundo denunciaron– un incremento significativo do tráfico pesado, movemento continuo de materiais, ruído, emisións de po e unha maior presión sobre as vías locais. “Non estamos ante unha preocupación menor, senón ante un impacto real sobre a saúde, o descanso e a seguridade da veciñanza”, sinalaron.

A Plataforma tamén alertou do impacto territorial da iniciativa, advertindo de que este tipo de instalacións poden comprometer a habitabilidade, a paisaxe e o valor residencial das aldeas afectadas, ademais de condicionar o seu modelo de futuro.

Outro dos aspectos criticados foi a falta de información e participación pública. A este respecto, consideran insuficiente a publicación formal da documentación en canles oficiais e reclaman “unha información máis próxima, clara e accesible para a cidadanía”.

Durante a súa intervención, a Plataforma puxo o foco no papel do Concello de Teo, ao que lle pediu que abandone unha actitude pasiva e exerza as súas competencias en defensa da veciñanza. Aínda que recoñecen que a autorización final depende da Xunta de Galicia, insisten en que a administración local debe asumir un papel activo dada a súa proximidade ao territorio.

En concreto, solicitaron ao goberno municipal un compromiso claro para opoñerse á instalación neste emprazamento, así como unha actuación rigorosa no ámbito urbanístico, viario e administrativo. Tamén cuestionaron a idoneidade das vías locais para soportar tráfico pesado continuado.

A Plataforma concluíu facendo un chamamento á responsabilidade institucional e reclamando o apoio explícito do Concello. “A veciñanza non pide privilexios, pide sentido común, protección e que se teña en conta que esta non é unha localización indiferente”, afirmaron.

Finalmente, advertiron de que unha posición clara do Concello enviaría unha mensaxe relevante á Xunta de Galicia sobre a falta de apoio social e institucional ao proxecto, o que podería axudar a unha decisión contraria á autorización da instalación da planta.