Verea carga contra Sanmartín por “non cumprir o que asina” sobre a xestión da auga

Verea comezou agradecendo a presenza dos medios e explicou que se lles entregou documentación que tamén será remitida a todos os medios de comunicación. Nesa documentación, segundo destacou, “pódese ver claramente como Goretti Sanmartín asina, co seu puño e letra, que o modelo de xestión da auga debe decidirse democraticamente no Pleno”.

“É necesario ter a cara de cemento armado para dicir agora que non interesa a vontade democrática do Pleno, que non deixa de ser a vontade democrática de todos os santiagueses”, afirmou. O líder popular preguntouse por que na lexislatura pasada a propia Sanmartín “asinou, votou e obrigou a que o modelo de xestión fose decidido democraticamente” e, sen embargo, agora pretende “saltarse esa vontade”.

Segundo explicou, trátase dun documento “claro, expreso e sen matices”, no que a alcaldesa “firma nun documento oficial que non se licitará o servizo ata que o Pleno determine a forma de xestión”. Ante isto, Verea cuestionou “como se pode cualificar a un representante público que non cumpre o que asina”, e apuntou a adxectivos como “incumpridor?, falto de palabra?, hipócrita? ou oportunista?”.

O dirixente popular asegurou que este é “un caso máis dunha alcaldesa que leva tres anos demostrando que non cumpre os seus compromisos”, definíndoa como unha persoa “de conviccións fráxiles, con criterios cambiantes e na que non se pode confiar”. “A ninguén nos gustaría ter unha amiga así, que te deixa tirado, que non ten palabra; pois tampouco é aceptable ter unha alcaldesa que fai o mesmo cos cidadáns”, engadiu.

Verea criticou tamén que, ao non contar cunha maioría suficiente, o goberno municipal “decide abandonar o principio democrático” que eles mesmos defendían anteriormente.

Nun segundo bloque da súa intervención, o líder do PP puxo o foco na decisión do goberno de solicitar novos informes sobre o modelo de xestión. “Se xa encargaron un informe de 80.000 euros que, segundo eles mesmos, di claramente que a opción é a sociedade mixta, por que necesitan agora outro informe?”, preguntou.

Neste sentido, lembrou que foron os propios BNG e CA os que votaron no Pleno baseándose nese informe para defender a sociedade mixta. “Que máis informes necesitan para decidir que? Continúan a rirse de todos os santiagueses”, denunciou.

Ademais, cuestionou por que, se se van salta o Pleno e están convencidos da sociedade mixta, “non comezaron xa a traballar nela”, insistindo en que a actuación do goberno responde a unha falta de coherencia e de rumbo.

Para Verea, esta situación evidencia que tanto o BNG como CA e o PSOE “quedan retratados diante de toda a cidade como forzas políticas sen palabra, cuxa firma non vale nada”.

O líder popular concluíu asegurando que esta actitude forma parte dunha “deriva” na que a alcaldesa “dilapidou en tres anos todo o seu capital político”. “Todos podemos equivocarnos, pero o que a cidadanía non perdoa é que se minta”, advertiu, cualificando a situación de “gran decepción”.

Finalmente, Verea criticou que “o único proxecto político” do goberno municipal sexa “cruzar os dedos cada día para que o Partido Popular non acade a maioría absoluta”, en lugar de ofrecer solucións reais para a cidade.