Tradición e produto local nas Feiras do Abril de Val do Dubra

• O desfile de xoiería e cestería artesanal, punto culminante dunha fin de semana chea de actividades para todos os públicos.

Val do Dubra, 5 de abril de 2025. O Concello de Val do Dubra inaugurou esta mañá á nova edición das Feiras do Abril, unha celebración que mestura tradición, artesanía e gastronomía nunha cita xa imprescindible no calendario cultural da comarca. Desde primeira hora, veciñanza e visitantes achegáronse ao aparcadoiro de San Lourenzo de Bembibre, onde tivo lugar o mercado de artesanía, con postos variados e produtos elaborados por mans locais, apoiado pola Deputación da Coruña.

Ás 12:00 horas celebrouse o acto oficial de inauguración a cargo do alcalde de Val do Dubra, Diego Luis Díaz, acompañado da subdelegada do Goberno na Coruña, María Rivas e do tenente alcalde de Val do Dubra, Antonio Negreira.

No acto tamén participaron outros membros da Corporación e alcaldes e representantes doutros municipios da comarca —A Baña, Negreira, Tordoia…— así coma da Deputación da Coruña. Non faltaron os sons e os pasos do grupo local Regueifa, poñendo en valor o patrimonio oral e musical galego. Xa ao mediodía, a gastronomía tomou o protagonismo coa Demostración de Produtos Gastronómicos do Val do Dubra, da man do recoñecido cociñeiro José Manuel Mallón, cunha proposta de petiscos elaborados a base de produtos da Terra do Xallas, nunha iniciativa apoiada polo GDR Terras de Compostela.

A partir das 13:00 horas, as persoas asistentes puideron gozar dunha degustación con especial protagonismo para a vaca cachena e o tradicional pan de Val do Dubra.

Continúa a celebración esta tarde coa artesanía e o deseño como protagonistas

Coa tarde por diante, a programación continúa cun taller de estampaxe “Amor ó Teu”, seguido dunha demostración de cestería tradicional a cargo de Luís do Río. O momento máis agardado da xornada chegará ás 18:30 horas, co desfile de xoiería e cestería artesanal, unha mostra do talento local e da creatividade dos nosos artesáns.

Este desfile é froito do traballo desenvolvido no Obradoiro de Ourivería coordinado por Susi Gesto, co impulso de Artesanía de Galicia, e contará con pezas únicas da propia Susi e de Sara Viña (cesteira local), acompañadas por modelos e colaboracións especiais no vestiario da man da Asociación Xuvenil Regueifa, Brincadeira, Aduardo Rial e Nico Barcala. Neste desfile tamén participan os comercios locais: na decoración floral, da man da Floristería Alecrín e nos complementos, o molete de pan, a Panadería Sarote.

O broche da xornada porao a Orquestra Panamá, seguida da Disco móbil MG, nunha sesión de “tardeo” que se estenderá ata a noite.

O domingo, a feira continuará cunha xornada dedicada á tradición rural, o contacto coa natureza e a posta en valor do mundo agrario e apícola. Desde as 10:00 ata as 14:00 horas, terá lugar unha exposición de gando, xunto ao mercado de artesanía que continuará aberto durante toda a xornada. Ás 11:00 horas, celebrarase unha demostración de cestería coa artesá local Sara Viña, e ás 11:30 horas, os amantes dos cabalos poderán participar nunha ruta cabalar (prazas completas en menos de dúas horas desde a apertura da inscrición!).

Un dos momentos máis curiosos será o simulacro de protección civil, que se realizará ás 12:00 horas, seguido dunha actuación do Trío Alborada ás 13:00 horas. Xa pola tarde, ás 16:30 horas, terá lugar un faladoiro de apicultura, impartido por Alfonso Priegue, e ás 17:30 horas, pecharase o día coa exhibición de cans de agility na área recreativa de Bembibre a cargo de Mascoguau.

O luns 7, o protagonismo será para a gastronomía coa Festa da Empanada e a presenza dos foodtrucks da campaña Galicia Sabe Amar, promovida pola Xunta de Galicia, que traerán petiscos mariñeiros ao Campo da Feira de Bembibre de 11:00 a 18:00 horas. A actuación do Dúo Matices e a polbeira completarán o día.

O Concello de Val do Dubra convida á cidadanía a seguir gozando das Feiras do Abril, unha proposta para toda a familia onde tradición e modernidade van da man.