Teo premiará o esforzo e traballo de deportistas e clubs locais na I Gala do Deporte Teense

• A cita será o vindeiro 3 de xaneiro de 2025 e celebrarase no Auditorio Municipal, onde os premiados estarán arroupados por familiares, amigos e xente do sector
• Entre os galardoados destacan figuras como o futbolista do R.C. Deportivo da Coruña, David Mella; a karateka Ruth Lorenzo ou o exciclista, Ezequiel Mosquera
• O Concello pretende potenciar o deporte local, que nos últimos anos recolleu grandes éxitos e ten unha gran proxección nacional e internacional

Teo (A Coruña), 4 de decembro de 2024.- O Concello de Teo celebrará o vindeiro 3 de xaneiro de 2025 a súa I Gala do Deporte Teense, onde se premiará o traballo e esforzo de deportistas e clubs locais.

Así, entre os galardoados destacan figuras como o futbolista do R.C. Deportivo da Coruña, David Mella; a karateka Ruth Lorenzo ou o exciclista, Ezequiel Mosquera; entre outros galardoados, pois este ano serán sete as categorías premiadas.

Desta forma, o Concello pretende potenciar o deporte local, que nos últimos anos recolleu grandes éxitos e ten unha gran proxección nacional e internacional. Amais, o Goberno local quere, desta forma, poñer en valor os deportistas, como exemplo de esforzo e constancia, e os clubs, como impulsores de disciplina e valores entre a cativada, fomentando unha competividade baseada no respecto entre xogadores.

Neste senso, para o Concello de Teo o deporte é unha prioridade. De feito, neste ano 2024 convocou os Premios á excelencia deportiva para os deportistas galego-teenses de alto nivel, cunha dotación orzamentaria total de 10.000 euros. O obxectivo prioritario foi apoiar ás persoas deportistas galegas de Alto Nivel que estean empadroadas no Concello de Teo e que participaron en competicións deportivas oficiais de categoría absoluta de ámbito mundial, europeo ou estatal no ano 2023.

Así mesmo, o Concello tamén aprobou as axudas destinadas á organización, promoción, preparación e participación deportiva de clubs e deportistas federados/as no ano 2024, por un importe total de 47.000 euros, dos que 12.000 euros se destinarán ás solicitudes formuladas por deportistas federados/as.

Con todo, estas axudas e os premios que se entregarán o vindeiro mes de xaneiro pretenden potenciar o deporte en xeral e o local en particular, promover a práctica deportiva, a creación de canteiras de deportistas no Concello de Teo, tanto a curto como a longo prazo e impulsar, deste xeito, formas de ocio alternativo.