Teo contará cun centro de día tras asinar un convenio de 600.000 € coa Xunta
A alcaldesa de Teo, Lucía Calvo de la Uz, e a conselleira de Política Social e Igualdade, Fabiola García, asinaron este mércores un convenio de colaboración para o financiamento das obras de adaptación do local que albergará o futuro centro de día de Teo, situado en Montouto, cun investimento total de 600.000 euros.
Líder Redacción
19 de diciembre de 2025 a las 20:48
O proxecto desenvolverase nun edificio illado cunha superficie construída de 910 metros cadrados, dos cales 829,40 m² son de superficie útil. O espazo destinado ao centro de día ocupará 532,62 m² útiles, superando amplamente a superficie mínima esixida pola normativa vixente, mentres que os 296,78 m² restantes reservaranse como área de posible ampliación futura.
O deseño do centro organizarase a partir dunha entrada principal situada nun punto central, desde a que se distribuirán dúas zonas diferenciadas. Á dereita localizaranse os espazos de maior actividade e participación colectiva, como a zona de actividades, a sala polivalente, o comedor e a cociña con office e almacén auxiliar. Á esquerda da entrada situaranse os espazos máis funcionais, técnicos e de atención personalizada, como os despachos administrativos, a sala de atención social e enfermería, os vestiarios e aseos do persoal e o cuarto de instalacións, garantindo así o cumprimento do programa funcional obrigatorio.
No extremo esquerdo do edificio, tras a zona técnica, habilitarase un almacén adicional que poderá transformarse no futuro nunha ampliación do centro, ben para aumentar o número de usuarios ou para incorporar novas áreas de atención especializada.
O proxecto incorpora criterios de accesibilidade universal, confort térmico e acústico, eficiencia enerxética, seguridade contra incendios e sinalización cognitiva, cumprindo cos estándares necesarios para a súa acreditación como centro de servizos sociais. Ademais, procederase á urbanización da contorna, cunha dobre zona de aparcamento e espazo de manobra que facilitará o correcto funcionamento do centro.
Un servizo esencial para a xente maior de Teo
O futuro centro de día, solicitado por primeira vez de maneira oficial polo actual Equipo de Goberno á Xunta de Galicia, terá como finalidade mellorar a calidade de vida e o benestar das persoas maiores de Teo, ofrecendo un servizo de atención diúrna con capacidade máxima para 40 prazas.
Este novo recurso permitirá tamén facilitar a conciliación familiar, xa que na actualidade moitas familias vense obrigadas a desprazarse a concellos limítrofes para acceder a este tipo de servizo.
Cómpre lembrar que no municipio de Teo residen máis de 4.000 persoas maiores de 65 anos, polo que, segundo subliñou a alcaldesa, trátase dun proxecto vital para o concello, ao ofrecer un servizo básico e fundamental para o benestar e a atención da veciñanza maior.
