Santiago e Padrón renovan a súa unión un ano máis nas Festas do Apóstolo

A Corporación compostelá recibiu a súa homónima padronesa na praza do Obradoiro, onde se produciu o intercambio de bastóns de mando entre os dous rexedores e os saúdos protocolarios. Logo, os/as representantes municipais de ambos os dous concellos dirixíronse á Casa do Concello.

No Salón Vermello do Pazo de Raxoi, a alcaldesa de Santiago, Goretti Sanmartín e o rexedor padronés, Anxo Rei, destacaron os máis 60 anos de tradición desta irmandade entre Compostela e Padrón.

A rexedora compostelá recordou a importancia de «buscar os puntos de colaboración» e os «espazos de colaboración» entre as dúas vilas, e fixo fincapé na prioridade que comparten na actualidade de «compaxinar o atractivo patrimonial, histórico e cultural con garantir a mellor calidade de vida á veciñanza», así como o de traballar conxuntamente para «conseguir que haxa diversificación económica», buscando «saídas laborais tanto para a xente moza como para as mulleres».

Anxo Rei agradeceu o convite e lembrou os fortes vínculos entre ambas urbes, e aludiu ao reto da xestión do turismo en ambas vilas e na importancia de «asegurar a calidade de vida dos veciños e as veciñas». O rexedor convidou a Corporación a unha nova celebración do Día de Santiago en Padrón a vindeira Pascua.

Despois dos discursos, as dúas Corporacións saíron aos balcóns de Raxoi para escoitar as interpretacións das bandas municipais de música das dúas vilas.