Santiago autoriza a poxa pública de catro inmobles declarados en ruínas

Iago Lestegás anunciou que, tras a luz verde á venda forzosa dos catro inmobles e ao prego de condicións de participación na poxa pública, por parte do executivo local, o seguinte paso será a publicación da licitación no Boletín Oficial da Provincia da Coruña e no perfil do contratante do Concello de Santiago.

O edil salientou que se trata da “primeira vez” que se vai levar a cabo o procedemento de poxa pública dos inmobles incluídos no Rexistro de Soares. “Isto significa que tivemos que configurar dende cero todo o procedemento de venda forzosa, porque nunca antes se fixera aquí. Poñer en marcha procedementos que nunca antes se fixeron aquí ten unha dificultade engadida», detallou.

Nesta liña, recordou que para o Goberno municipal, a rehabilitación, recuperación e reutilización do patrimonio abandonado é unha «prioridade» dende o comezo do mandato e que, «aínda que o procedemento sexa longo e difícil, o Rexistro de Soares é unha ferramenta útil para mobilizar o patrimonio inmobiliario desaproveitado e para ampliar a oferta de vivenda no centro da cidade aproveitando mellor o que xa temos».

O concelleiro recordou que en febreiro do ano pasado declarouse incumprido o deber de conservación e rehabilitación dos catro edificios abandonados da cidade histórica e que teñen declaración de ruína dende 2010 e en abril foron incluídos no Rexistro de soares. Tres dos catro inmobles (San Roque 23, Praciña das Penas 5 e Loureiros 14) pertencentes á mesma comunidade de herdeiros, presentaron un recurso de reposición contra a inclusión no Rexistro de Soares que foi destestimado.

Posteriormente, en decembro de 2024, incoouse o procedemento para a tramitación da venda forzosa mediante poxa pública destas catro propuedades, anuncio que foi publicado no BOE do pasado 27 de xaneiro. A antedita comunidade de herdeiros, titular de tres dos catro inmobles, solicitou a suspensión deste procedemento, petición que foi desestimada pola Xunta de Goberno local.

Procedemento de poxa pública

A venda forzosa deste catro inmobles en estado de ruína realizarase mediante poxa pública, a través dun procedemento aberto e tramitación ordinaria por lotes, un por cada predio: o lote 1, correspondente ao inmoble da Praciña das Penas 5, cunha valoración de 145.237,61 euros; o lote 2, na Rúa dos Loureiros 14, por 101.746,31 euros; o lote 3, correspondente á propiedade sita na rúa de San Roque 23, cunha valoración de  103.699,83 euros e o lote 4, na rúa do Espírito Santo 33, por un importe inicial de 69.639,18 euros.

Condicións de participación

O concelleiro de Urbanismo detallou que, unha vez publicada a licitación, poderán participar nela «todas as persoas que teñan capacidade de contratar que non estean comprendidas nalgunha das causas de incompatibilidade previstas na Lei de Contratos do Sector Público e que cumpran os requisitos fixados no prego».

As ofertas presentaranse exclusivamente por medios electrónicos na Plataforma de contratación do Sector Público durante un prazo de vinte días naturais desde o día seguinte á data de publicación do anuncio nesta plataforma. Unha vez rematado o prazo, o Concello encargarase de seleccionar e adxudicar a oferta económica máis vantaxosa.

A persoa licitadora poderá concorrer a varios lotes, presentando unha oferta en cada un deles indicando a orde preferencia, xa que só poderá adxudicarse un lote por adxudicatario. «Non nos interesa que unha única persoa ou entidade se faga con todos os edificios do Rexistro de Soares a través deste procedemento pero tampouco se desexa que quede deserto ningún lote», explicou Lestegás.

Prazos de execución

En relación aos prazos, a persoa adxudicataria terá que aboar o importe total de adxudicación e os gastos de tramitación no prazo máximo de un mes dende a notificación da adxudicación polo Concello e solicitar a licenza de rehabilitación no prazo máximo de tres meses dende a formalización. As obras de rehabilitación deberán iniciarse no prazo de un ano dende a toma de posesión do predio, e terán que ser rematada e obter a licenza de primeira ocupación no prazo máximo de dous anos dende a formalización.

Se a poxa fose declarada deserta, o Concello, no prazo de seis meses, poderá adquirir o inmoble con destino ao patrimonio público do solo ou convocará de novo, no mesmo prazo, con rebaixa do prezo tipo nun 25%. Se a segunda poxa tamén quedase deserta, o Concello, no prazo doutros seis meses, poderá adquirilo polo prezo de licitación da segunda poxa.