Ribeira lánzase a un verán cheo de festas, sabor a mar e as actuacións de Kiko Veneno, Huecco ou Lichis

• O goberno tripartito destaca a súa unidade e compromiso co rural, coa cultura e co sector mariñeiro, nunha entrevista onde avanzaron programacións exclusivas para os meses de verán.

Ribeira prepárase para un verán vibrante, con festas gastronómicas, concertos de artistas recoñecidos e iniciativas culturais únicas que poñen en valor o patrimonio local. Así o confirmaron os concelleiros Fernando Abraldes e Fran Suárez-Puerta nunha entrevista en Radio Líder Santiago, onde repasaron os dous anos de xestión do goberno tripartito conformado por BNG, PSOE e o Partido Barbanza Independente (PBI).

“Este goberno naceu da necesidade de renovar unha Ribeira que levaba décadas ancorada”, afirmaron, salientando que “a veciñanza está no centro de cada decisión, tanto no mar como no turismo”.

Entre as citas máis destacadas do verán están a Festa do Percebe (27 de xullo) e a Festa da Navalla (10 de agosto), ambas na parroquia de Aguiño, onde se porán en valor produtos do mar de calidade excepcional. Tamén se anunciou o Gastromar de Ribeira (22 ao 24 de agosto) e o encontro de embarcacións tradicionais (18-20 de xullo).

O Concelleiro do Mar puxo o foco na sustentabilidade e no apoio ao marisqueo. “Temos que sementar os bancos marisqueiros, porque son o sustento de moitas familias. O cambio climático xa se nota, pero confiamos na recuperación da Ría”, declarou Abraldes.

O turismo tamén é unha prioridade. “Queremos un turismo familiar, que consuma, que respecte e que fale ben de Ribeira cando volva aos seus lugares de orixe”, dixo Suárez-Puerta. Iniciativas como o Camiño dos Mitos e Lendas con Toñito de Poi ou sesións de astronomía nocturna xa están a atraer visitantes e veciñanza por igual.

No eido musical, o Concello anunciou actuacións de Kiko Veneno, El Chojin, Huecco, Galician Army e Lichis, entre outros. “Apostamos pola música en directo, pola cultura e pola calidade”, remarcou o edil de festas.

O executivo local tamén traballa por desbloquear problemas co uso dos espazos portuarios para festas tradicionais. “Non imos renunciar a celebrar as festas onde sempre se fixeron. O diálogo con Portos de Galicia é clave”, indicaron.

Finalmente, anunciouse que as obras do clube de remo de Ribeira estarán listas antes de rematar o ano. “É unha prioridade absoluta. Os rapaces precisan esa instalación”, aseguraron.