Raxoi estima en máis de 16.000 euros o impacto da borrasca Kirk nas árbores da cidade
24/10/2024 O Departamento de Parques e Xardíns avaliou en 16.654 euros o total que debería asumir o Concello de Santiago para a recuperación das máis de 130 unidades arbóreas que sufriron danos como consecuencia do paso da borrasca Kirk. Esta estimación contemplaría unha partida de 12.254 euros para a adquisición de novas árbores e outra de 4.400 euros para os labores de plantación e suxeición.
Líder Redacción
24 de octubre de 2024 a las 19:36
O paso da borrasca Kirk pola cidade o pasado 9 de outubro, con ventos que alcanzaron os 114 km/h, tivo un impacto na masa árborea da cidade que, tras unha minucionsa análise, o Departamento de Parques e Xardíns cuantificou en 133 unidades afectadas de xeito irreversible, que suporían un custo de recuperación de 16.654 euros, dos que 12.254 euros correspoderían á compra das novas unidades e 4.400 euros aos labores de plantación e suxeición das árbores que serán repostas en rúas, parques e zonas verdes da cidades.
No caso da Alameda vironse afectados tres tilos de gran porte e de especial valor sentimental, paisaxístico e patrimonial, situados no paseo central, na zona do parque infantil e un terceiro na costa da facultade de Químicas, así como a caída dunha póla importante dun chopo do mirador e de varias pólas de diferentes dimensións no resto da carballeira.
O concelleiro de Sustentabilidade Ambiental, Xesús Dominguez, acompañado do xefe de Parques e Xardíns, Gregorio López, fixo un primeiro balance das consecuencias do paso de Kirk nunha rolda de prensa celebrada o 10 de outubro. Ao día seguinte, ambos acompañaron a alcaldesa de Santiago, Goretti Sanmartín, para amosarlle in situ a situación derivada do paso do temporal na Alameda. Nos días posteriores ao paso de temporal, o labor do Concello centrouse na retirada de árbores caídas nas calzadas e na reparación de avarías de distinto alcance, así como a avaliación dos danos sobre as árbores.