Radio Líder emite este sábado un programa especial desde Padrón

Este sábado 21 de decembro, a partir das 09:00 horas, Radio Líder Santiago emitirá un programa especial de Nadal desde o Concello de Padrón. Poderase escoitar na frecuencia 97.7 FM e tamén a través da web radiolidersantiago.com.

Este espazo de tres horas de duración contará coa participación de representantes destacados da cultura, o comercio, a política e outros sectores clave do día a día do municipio padronés. O obxectivo é celebrar estas festas destacando a riqueza e a vitalidade de Padrón, poñendo en valor o traballo das persoas e institucións que fan posible o desenvolvemento do municipio.

Será unha oportunidade única para achegarse á realidade local e vivir o espírito do Nadal de preto. Non o perdas!

NADAL EN PADRÓN

Este venres continúa a programación de Nadal en Padrón. Pola tarde, na Igrexa de Padrón, poderase desfrutar dun gabinete de curiosidades musicais con dúos líricos de canción, ópera e zarzuela. Máis tarde, ás 20:30 horas, a fachada do Convento do Carme iluminarase coas tradicionais proxeccións de Nadal, un espectáculo que promete engaiolar a veciñanza e visitantes.

Actividades de Nadal para os próximos días:

• Sábado 21 de decembro: Celebrarase o agardado Festival de Panxoliñas no auditorio municipal ás 19:00 horas, coas actuacións das Corais Polifónicas de Cariño, Lalín e Padrón.
• Domingo 22 de decembro: Comeza a campaña de agasallos nos comercios locais para dinamizar as compras de Nadal. Ademais, Papá Noel visitará diferentes colexios da vila durante a xornada.
• Luns 23 de decembro: Papá Noel chegará á rúa Real ás 17:30 horas para recibir aos máis pequenos. Ás 19:00 horas, no paseo do Espolón, terá lugar o espectáculo infantil Os Piñeiriños: Xa é Nadal, seguido dunha sesión musical con DJ A Duendeneta.

Lembra que todas as actividades son gratuítas ata completar aforo. O Concello de Padrón invita a toda a veciñanza e visitantes a participar nesta programación pensada para desfrutar en familia e celebrar un Nadal máxico.