Pulpa impónse na cuarta convocatoria de Onda Chicha cun récord de participación do público
Líder Redacción
13 de febrero de 2026 a las 12:48
- Xa está aberto o prazo da quinta edición de Onda Chicha, despois dunha cuarta convocatoria na que se duplicou a participación do público, e tras coroar anteriormente a Lisdexia, Amaramar e Why Not? como proxectos gañadores
Onda Chicha consolídase como unha plataforma para a música emerxente en Galicia tras pechar a súa cuarta convocatoria, na que a banda Pulpa, de Narón, resultou proxecto gañador. Onda Chicha é unha iniciativa conxunta de Chichalovers e Radio Líder Santiago, que conta coa colaboración de Quincemil, Arde Música, Garaxe Land, Daveiga, Bodegas Lodeiros e Fogar Festivais. A iniciativa ten a finalidade de apoiar, visibilizar e promover o traballo de artistas e grupos emerxentes, ofrecéndolles unha plataforma real de difusión, visibilidade e actuación en directo.
Pulpa impúxose cunha proposta de rock alternativo de marcada influencia post-punk, cun son escuro, denso e expansivo. As súas cancións constrúen un universo decadente e visceral que, de xeito inesperado, se abre a estoupidos máis luminosos, apoiados en letras combativas e humanas. A identidade sonora do grupo susténtase nunha sección rítmica potente, guitarras afiadas e o uso de sintetizadores que evocan sonoridades doutras épocas, reinterpretadas cun enfoque actual e audaz, sobre as que destacan unhas liñas vocais intensas e emocionais.
O recoñecemento chega tras a publicación do seu primeiro LP, Ritos del nuevo mundo, no 2024, gravado en Álamo Shock (Madrid) coa produción de Guille Mostaza, un traballo que marca un punto de inflexión na súa traxectoria artística.
Xurado plural e voto do público
O fallo da cuarta convocatoria correspondeu a un xurado integrado polo equipo de Chichalovers, Radio Líder Santiago, a Sala Capitol, Garaxe Land e o xornalista musical Rodri Míguez, xunto co voto do público, que se incorporou por primeira vez na terceira convocatoria como parte do proceso de selección. Nesta cuarta edición, a resposta cidadá duplicouse, acadando un total de 2.256 votos, a cifra máis alta rexistrada ata o momento.
Catro edicións, catro proxectos gañadores
Desde o seu lanzamento, Onda Chicha coroou xa catro proxectos: Lisdexia na primeira convocatoria, Amaramar na segunda, Why Not? na terceira e agora Pulpa nesta cuarta edición, reflectindo a diversidade e calidade da escena musical emerxente galega.
Aberta a quinta convocatoria
Co peche desta tempada, xa está aberto o prazo de inscrición da quinta convocatoria de Onda Chicha, que permanecerá aberto ata o 28 de febreiro. As bandas e solistas seleccionadas optarán a unha entrevista en Radio Líder Santiago, á gravación dun tema en Chichalovers, a unha entrevista en Quincemil e á posibilidade de participar no CHICHAFEST, que se celebrará na Sala Capitol de Santiago de Compostela o 13 de xuño. Ademais, o proxecto gañador de todas as edicións do Onda Chicha terá a oportunidade de gravar un EP nos estudos de Garaxe Land.
