Panorama, Budiño e moito máis: fin de semana de festa e devoción a Santa Minia

• O alcalde anuncia un auditorio multifuncional de 4 millóns de euros, unha nova praza para a Festa da Santa Minia e defende o acordo local entre PSOE e PP como “un exemplo de responsabilidade e sentido común”

O alcalde de Brión, Pablo Lago, foi o protagonista dunha entrevista en profundidade no espazo matinal de Radio Líder Santiago, conducido por Álvaro Veiga, onde repasou os principais retos, proxectos e noticias do seu mandato. Con total transparencia e espírito construtivo, o rexedor abordou cuestións clave que marcarán o futuro do municipio, desde investimentos en infraestruturas ata a singularidade política local que o leva a gobernar cun acordo estable entre socialistas e populares.

A conversación xirou arredor de tres grandes eixos: proxectos estratéxicos, a organización da Festa de Santa Minia 2025 e a actualidade política municipal. Lago aproveitou os micrófonos de Radio Líder para facer anuncios relevantes, entre os que destacou o proxecto dun auditorio municipal multifuncional, deseñado para albergar actividades culturais, unha biblioteca intelixente e espazos para a mocidade.

“Xa temos o proxecto enriba da mesa. Agora tócame a min buscar a financiación. O orzamento ronda os 4 millóns de euros. Pensamos en grande porque Brión merece pensar en grande”, afirmou o alcalde.

O novo auditorio localizarase nunha finca na rúa Tarrío, ao carón da residencia, “un emprazamento privilexiado, con bo acceso e zona de aparcadoiro”, explicou Lago. Esta infraestrutura forma parte dunha visión de futuro que busca ofrecer novos espazos culturais e sociais nun concello en constante crecemento.

Un novo espazo para Santa Minia

Lago tamén confirmou un segundo proxecto, máis inmediato, vinculado á Festa de Santa Minia: a humanización dunha finca anexa ás Polbeiras, que substituirá á deteriorada carballeira como espazo central das festas. “Non queremos andar todos os anos correndo para acondicionar o lugar. A idea é ter unha praza estable, con árbores, gradas e mesmo un pequeno auditorio ao aire libre para actividades de verán”, anunciou.

“Imos investir uns 150.000 euros. Non é unha obra milagre, pero si moi necesaria. A carballeira está moi afectada e temos que preservar o patrimonio sen deixarnos levar pola improvisación”, indicou Lago.

O alcalde destacou que este novo espazo permitirá organizar non só as festas, senón actividades durante todo o ano. O proxecto está en fase de borrador e contará con financiamento municipal e, previsiblemente, doutros niveis da administración.

Críticas á obra da estrada AC-543

Preguntado pola situación da estrada AC-543, unha das arterias principais do concello, o alcalde foi claro nas súas críticas: “A empresa non está a cumprir os prazos. Xa pasaron o prazo de execución e tivemos que intervir dende o Concello e a Xunta”. Lago confirmou que, tras a visita da conselleira de Infraestruturas, puxéronse novos límites á empresa adxudicataria para que remate os tramos abertos antes de continuar co resto da obra.

Tamén explicou que as beirarrúas ampliadas responden a unha demanda veciñal: “As antigas beirarrúas non eran transitables nin para cadeiras de rodas nin para carriños de bebé. Pero o problema maior estaba debaixo, co alcantarillado e abastecemento nun estado lamentable”.

A Santa Minia 2025: música, devoción e identidade

Lago presentou a programación da Festa de Santa Minia 2025, que se celebrará os días 26, 27 e 28 de setembro, cun cartel que combina tradición e modernidade. “Haberá actividades para nenos, maiores e mocidade. Contamos con orquestras como Unión y Fuerza, Marbella e, como gran estrela, Panorama”, confirmou. A presenza do grupo Budiño e o espectáculo de luces completan un cartel pensado “para todos os públicos”.

“Panorama era unha promesa que fixen no palco da Olimpus hai tres anos. Non conseguimos que viñese Fátima Pego este ano, pero xa está apalabrada para o próximo”, anunciou Lago entre risas.

O alcalde tamén fixo fincapé na dimensión institucional da festa: “Aquí xuntámonos todos, sen importar a cor política. A Santa Minia é un punto de encontro e de convivencia”. Tamén quixo agradecer o traballo da Policía Local, Protección Civil, técnicos municipais e demais persoal implicado: “Eu son o da foto, pero detrás hai moita xente traballando duro para que todo saia ben”.

Un acordo histórico: PSOE e PP, xuntos polo ben común

A parte final da entrevista centrouse no pacto político entre o PSOE e o PP en Brión, un feito insólito na política galega, que Pablo Lago defendeu con rotundidade. “Non son político, son persoa. E como persoa teño claro que por enriba das siglas está Brión. Acordamos co PP sacar proxectos adiante, e a veciñanza entendeu perfectamente esa decisión”, sentenciou.

Lago explicou que o PP non forma parte do goberno municipal, pero si participa activamente nas comisións, como a de Facenda. “É un acordo intelixente, de responsabilidade. Aquí non se trata de caprichos, senón de sacar adiante aquilo que os veciños precisan”.

“Se algún día me botan do partido por poñer por diante os intereses do pobo, seguirei facendo o mesmo. A política local ten que ser útil, non un ring de boxeo”, afirmou.

Preguntado sobre se este modelo podería replicarse noutros concellos, Lago foi claro: “Xa me chamaron outros alcaldes. Igual isto abre unha porta para unha política máis racional, máis útil e menos encorsetada polas directrices estatais”.

A entrevista con Pablo Lago deixou entrever a imaxe dun alcalde comprometido co seu concello, ambicioso nos proxectos e firme nas conviccións. Cun estilo directo e afastado do politicamente correcto, defende unha xestión centrada na cidadanía e non nos intereses partidistas.

Como el mesmo dixo: “Se todos somos veciños, o noso deber é traballar polo ben común. Para iso estamos aquí”.