Padrón busca mocidade para formar parte do voluntariado xuvenil este verán

• A Oficina Municipal de Voluntariado mantén aberto o prazo de inscrición ata o 5 de maio para participar en dúas iniciativas culturais

Padrón. 25-4-2025.- O Concello de Padrón, a través da súa Oficina Municipal de Voluntariado (OMV), vén de poñer en marcha unha nova campaña de inscrición para incorporar mozas e mozos de entre 16 e 30 anos ao seu equipo de voluntariado xuvenil. O obxectivo desta convocatoria é reforzar o grupo actual para poder desenvolver dúas propostas culturais durante o verán, unha orientada exclusivamente á mocidade e outra de carácter interxeracional.

A campaña aposta pola participación activa da mocidade en dinámicas culturais e sociais  que lles permitan coñecer mellor o territorio e contribuír á súa dinamización. Desde a OMV convidan ás persoas interesadas a sumarse a esta experiencia enriquecedora e comprometida coa comunidade.

As prazas son limitadas e o prazo de inscrición remata o domingo 5 de maio. As persoas interesadas poden informarse a través do teléfono 981 817 025 ou escribindo ao correo voluntariado@padron.gal.

O voluntariado xuvenil é unha das liñas estratéxicas do programa Padrón Solidario, co que o Concello de Padrón fomenta o compromiso social e a participación cidadá, especialmente entre a poboación máis nova.