O PP de Santiago esixe a recuperación da liña de autobús ata as Casas Novas

• Os concelleiros, Adrián Villa e María Baleato, reuníronse con máis de 30 veciños e veciñas afectados, por unha decisión dos nacionalistas que chegou “sen previo aviso”
• Villa definiu ao BNG de “tirano”, ao estar a modificar diferentes servizos, en pleno verán, “sen ningún tipo de diálogo coa veciñanza e sen sentido aparente”

Os concelleiros do Partido Popular de Santiago, Adrián Villa e María Baleato, achegáronse ao barrio de Casas Novas, para reunirse con máis de 30 veciños e veciñas afectados pola retirada da súa liña de autobús urbano.

Foi en pleno verán cando, de forma autoritaria, o BNG decidiu facer unha modificación no percorrido da liña 9, que realizaba a ruta Cidade da Cultura-Praza de Galicia-Casas Novas, deixando, así, a este barrio sen servizo.

Pola contra, “a liña 4 mudou o seu percorrido para chegar ás Casas Novas, pero a realidade é que isto non está a suceder, posto que se fixo de forma “informal, sen previo aviso e sen constancia na información que ten TRALUSA”, indicaba María Baleato.

Adrián Villa tachou aos nacionalistas de “tiranos”´, por estar tomando decisións, en pleno verán, sen ningún tipo de diálogo coa veciñanza, parece dixo que “os que alardean e sacan peito de transparencia e diálogo, resultan ser os máis escuros”.

A veciñanza que, desde o comezo do verán está sen servizo de transporte público, trasladou así a súa preocupación, “xa que estamos a piques de entrar no mes de setembro e a cativada e os máis maiores, non poderán contar coa súa liña de bus ata o barrio”, remarcou o edil popular.

Esta situación comeza cando se pecha o Pombal polas obras, pero isto “non exime aos nacionalistas da súa obriga de buscar as mellores alternativas para o transporte público”, destacou.

“É certo que a solución dada foi que a liña 4 subise ata as Casas Novas desde as Galeras, pero non está a garantirse, ben por descoñecemento dos condutores ou ben porque van mal de horario, posto que non é algo oficial e non aparece reflexado nos horarios, nin itinerarios de TRALUSA, o que asemella ser unha nova improvisación e unha forma moi opaca de eliminar unha liña de autobús público”, indicou Adrián Villa.

Os populares, ante semellante despropósito por parte dos nacionalistas, solicitarán formalmente a recuperación da liña 9 e afean ao BNG este “desleixo e falta de respecto” aos veciños e veciñas deste barrio da capital de Galicia.