O PP de Santiago acusa ao goberno nacionalista de «rirse» dos traballadores dos Centros Socioculturais

• Segundo o concelleiro popular, José Ramón de la Fuente, “as mentiras do goberno local e a súa lexendaria incapacidade de xestión chega, neste caso, a unha gravidade difícil de superar”.

O Partido Popular de Santiago leva meses avisando da situación insostible dos Centros socioculturais, “non sabemos -asegurou o concelleiro popular, José Ramón de la Fuente-, que se esconde detrás desta indolente e neglixente xestión, pero non ten explicación que, tras dous anos dándolle voltas a unha nova licitación destes contratos, aínda non se teñan feito”.

“O certo é que os actuais contratos naceron mal, non se dimensionaron adecuadamente, nin dende o punto de vista técnico, nin económico e axiña foi evidente que non había máis alternativa que ir a unha nova licitación”, remarcou.

De la Fuente insistiu en que, “a pesar de sabelo, o goberno nacionalista non foi quen de sacar adiante o expediente, prorrogou os contratos varias veces, en contra do criterio das empresas, facendo imposible a viabilidade das prestacións; agora, reséntese a situación laboral dos traballadores afectados e os servizos que reciben os usuarios”.

“O propio goberno local manifestouse en diversas ocasións sobre a inaprazable necesidade de proceder a unha nova licitación -agregou-, anunciando incluso uns prazos que foron sistematicamente incumpridos, poñendo de manifesto a súa nula capacidade para xestionar a tramitación dun novo expediente de licitación que, a día de hoxe, non foi aínda publicado”.

O popular reiterou que, “xa dende o principio do mandato, se viron os problemas, que foron denunciados polas empresas, que pediron incluso a rescisión dos contratos; os traballadores, que denunciaron impagos de nóminas; e os usuarios, que se queixaban das continuas suspensións de actividades”.

“O goberno nacionalista atreveuse tamén a anunciar, varias veces, a inminente licitación dos mesmos, dos que chegou a dicir que os pregos estaban listos, pero pasaron os meses e na plataforma de licitación non se publicaron”, subliñou.

De la Fuente tamén lembrou que, “en novembro pasado, os nacionalistas reorganizaron o departamento de Centros Socioculturais, co fin de levar a cabo un axuste global de tarefas, para un mellor funcionamento da rede de Centros que, á vista está, non dá resultados”.
“En xuño prorrogáronse de novo os contratos ata outubro e se anunciou que, nesa data, estaría resolta a nova licitación; estamos a menos dun mes e medio de que rematen as prórrogas e nada sabemos da licitación dos novos contratos; polo tanto, non se chegará a tempo de adxudicalos, volverán a prorrogalos outra vez, mentindo, unha vez máis, aos traballadores e empresas, -insiste de la Fuente-, os nacionalistas xa saben que non poden cumprir prazos, nin os compromisos, pero seguen adiante coa mentira”.

“A cuestión é clara, as mentiras do goberno local e a súa xa lexendaria incapacidade de xestión adopta, neste caso, unha gravidade difícil de superar”, agregou.

“Pronto estaremos á volta dun novo inicio de curso e xa nos estamos temendo a suspensión de actividades -lamentou-, veremos como se resinte a actividade ordinaria dos Centros ante esta situación de incertidume, provocada pola incapacidade do goberno nacionalista”.