O PP de Melide denuncia que o tripartito frea a reparación do peche do colexio A Martagona

Cómpre recordar que o mantemento e conservación dos centros, tamén dos peches perimetrais, é competencia dos Concellos. Malia isto, dende o PP de Melide puxémonos en contacto coa Consellería de Educación, cuxos responsables se comprometeron a cofinanciar ao 50% xunto co Concello a obra de reparación e substitución íntegra do peche, sempre e cando o Concello, como responsable do mantemento, sexa quen solicite o convenio de colaboración.

Con todo, o tripartito formado por AM, BNG e PSdG votou en contra de dita moción e limitouse a acusar á Xunta das deficiencias que ten o colexio, malia ser competencia municipal o mantemento do mesmo, así como a cargar contra a dirección do propio centro. Nin un só comentario de autocrítica sobre a falla de mantemento do goberno local durante todo este tempo, logo de xa seis anos gobernando.

Dende o PP de Melide considérase que a obsesión do alcalde e do seu goberno por culpar á Xunta de todo o que vai mal é moi pouco produtiva: “É lamentable que cando ten enriba da mesa a proposta da Consellería para cofinanciar a obra de substitución do peche, o alcalde prefira non solicitar o convenio para poder seguir facendo política en contra da Xunta, aínda que esto implique que os nenos e nenas do colexio volvan a saír perxudicados”, sinalan.

O grupo popular seguirá estando a disposición das familias afectadas, traballando ao carón da Consellería de Educación para buscar unha solución firme a esta situación, ao tempo que esixiremos ao goberno local que asuma a súa responsabilidade, adopte unha solución inmediata e se preocupe polo mantemento deste e dos demais centros educativos de Melide.