O PP de Melide denuncia o “caos económico” e critica unha nova modificación orzamentaria de 900.000 €

O tripartito local considera que é bo retirar 900.000€ do remanente de tesourería, é dicir, dos aforros municipais, para facer fronte a gastos correntes que debían ser máis que previsibles.

Pola nosa banda, este grupo considera que esta situación é altamente alarmante, máis tendo en conta que xa é a terceira modificación de crédito que o tripartito aproba neste exercicio do 2025, unha boa mostra da falta de previsión máis absoluta e do caos no que se move o goberno local.

Dende o PP de Melide considérase que esta situación non é aceptable e que seguiremos actuando ata onde faga falta: “Non podemos permitir que se xogue cos aforros de todos os veciños e se hipoteque o futuro deste Concello, sinxelamente por non saber gobernar e gastar máis do que se ten, a pesar de subir impostos continuamente. Cando unha familia ten que tirar dos seus aforros para pagar as facturas correntes do día a día, significa que algo non vai ben”, sinalan.

O grupo popular esixe ao executivo local que adopte medidas inmediatas para garantir a boa saúde económica do Concello, especialmente no que atinxe aos aforros municipais que permitan facer fronte a emerxencias ou gastos excepcionais.