O Festival Galicreques traerá Santiago máis de 60 funcións

O encontro está organizado pola Asociación Barriga Verde co apoio e patrocinio do Concello de Santiago, a Deputación da Coruña, a Xunta de Galicia e o Ministerio de Cultura e Deporte a través do Inaem e a Fundación SGAE. Compañías de Arxentina, Italia, Portugal, México ou Colombia darán a coñecer os seus novos espectáculos neste Galicreques tan especial, no que se celebran tres décadas de traxectoria.

A programación ofrecerá máis de 60 funcións e contará con máis de 20 compañías procedentes de 12 países distintos, dende Galiza ata Italia, Portugal, Colombia, Chile ou Arxentina.

Nesta edición número 30, o festival consolídase como unha das grandes citas culturais de Santiago, cunha carteleira que inclúe máis compañías e máis estreas ca nunca, o que pon de manifesto a súa proxección internacional e a calidade que vén sendo recoñecida ano tras ano.

30 aniversario

O aniversario contará con dous actos especiais. O primeiro será o mércores 8 de outubro, cunha festa de inauguración na Sala Capitol, que por primeira vez se incorpora como espazo de exhibición de monicreques. A velada, con actuacións e sorpresas, terá carácter restrinxido a convidados. O domingo 19, ás 12.00 horas, o escenario da Capitol acollerá a compañía aragonesa Teatro Arbolé e a súa proposta Los tres cerditos.

O segundo acto vinculado ao 30º aniversario será o luns 13, ás 20.00 horas, na tradicional carpa da Alameda. Alí, artistas que participaron ao longo dos anos compartirán co público a súa relación co festival, cos monicreques e coa cidade.

Primeiras estreas

O sábado 11 abriranse as estreas coa compañía colombiana El Guiñol del Guiñol, que representará por primeira vez El último árbol na tenda A Reixa. Ese mesmo día, ás 18.00 horas, no Centro Sociocultural do Romaño, a compañía galega Mircromina Teatro presentará Pasmo de Pedra.

Entre as propostas internacionais inéditas destacan a portuguesa Fío D’Azeite, que estreará O rei va nú na carpa da Alameda o domingo 12; os chilenos Títeres Candelilla, con Kuiyen, sueño mapuche o martes 14 na Fundación SGAE; ou os italianos Zaches Teatro, que presentarán en Santiago a súa nova Cenicienta.

Tamén haberá estreas de compañías xa coñecidas polo público, como a vasca Panta Rhei, Premio Galicreques 2018, que levará ao escenario Krim, pequeño lobo o xoves 16; ou os cataláns Fil de Guá, que ese mesmo día sorprenderán con Emproianova.

Clausura

A compañía galega Nauta pechará o festival o domingo 19 no Teatro Principal coa súa nova obra Ephimeros. A representación terá lugar ás 20.00 horas, xusto despois da entrega do Premio Galicreques 2025, cuxa persoa homenaxeada se dará a coñecer proximamente.

Xunto a Nauta e Mircromina, a terceira estrea galega será a de Kalina Teatro, que presentará Limonardo dá vento o venres 12 no CSC de Santa Marta, dentro da programación escolar.