O Estradense, clube centenario que soña con participar na Copa do Rei: «Levamos noites sen durmir»

• O presidente do Estradense fai balance dunha tempada histórica, marcada polo apoio da afección, a aposta pola canteira e os actos de celebración dos cen anos de vida do club.

O Club Deportivo Estradense vive un dos momentos máis doces da súa historia. Así o contou Toño Camba, presidente da entidade, nunha entrevista en Radio Líder Santiago, onde repasou a actualidade deportiva do club, o papel da afección, a importancia da canteira e os actos conmemorativos do centenario. “Está sendo un ano soñado. Todo está saíndo perfecto: a afección, o corpo técnico, os xogadores…”, asegurou Camba, visiblemente emocionado.

A tempada está a ser de «sobresaliente» para o Estradense, cun ambiente espectacular no estadio municipal, onde “non hai onde meterse na grada”. A implicación da mocidade e a promoción de xogadores do xuvenil ao primeiro equipo tamén son motivos de orgullo. “Debutaron bastantes xogadores do xuvenil, e iso fai que moitos amigos deles veñan animar. Incluso houbo partidos nos que foron citados cinco xuvenís”, explicou o presidente.

O club ten entre cella e cella un obxectivo claro: rematar a liga en segunda posición para optar a participar na Copa do Rei. Segundo comentou Camba, nun listado provisional o Estradense figuraba como o sétimo mellor equipo en coeficiente da Terceira División estatal. “Se conseguimos esa praza e finalmente imos á Copa do Rei, sería o colofón perfecto”, dixo. “Levamos noites sen durmir, soñando con esa posibilidade.”

100 anos de historia

O Estradense celebra este ano o seu centenario con diversos actos, entre eles a estrea dun documental no Teatro Principal da Estrada, esta tarde ás 20:00 horas. “Non quixen ver o documental antes para non emocionarme, pero sei que vai haber moitas sorpresas. Cando puxeron un adianto xa me prepararon porque sabían que era fácil que me emocionara”, confesou Camba.

O documental percorre os momentos doces e amargos do club e serve como homenaxe a unha historia centenaria que poucos clubs poden contar en Galicia.

Camba tamén falou do sacrificio persoal que implica ser presidente dun club modesto: “Para que isto funcione, tes que ter á familia ao teu lado. Eu teño a sorte de que a miña muller e os meus fillos me acompañan a todos os desprazamentos.”

A pesar dos éxitos, o club arrastra necesidades importantes, especialmente no céspede do campo, que xa ten máis de dez anos. “Por moito que o arranxemos, o céspede está mal. Se ascendemos, probablemente non nos deixen xogar nel en Segunda RFEF”, advertiu. Tamén mencionou a falta de vestiarios para equipos visitantes como outro problema pendente.

A entrevista deixa claro que o Estradense non é só un club de fútbol, senón unha institución con alma, xente comprometida e un futuro cheo de ilusións. Cun pé no pasado e outro no futuro, o club avanza coa forza da súa historia e o corazón da súa xente.

A entrevista completa, no seguinte enlace.