O Concello de Teo asumirá o pago de máis de 100.000€ pola «deixadez» do anterior goberno

• A reclamación foi interposta pola empresa Aquafit Gestion SL, quen xestiona as piscinas municipais teenses, ao negarse o anterior equipo de goberno a actualizar as tarifas a aboar polos usuarios das instalacións
• A entidade actora presentou en maio de 2019 e en decembro de 2021 ante o Concello de Teo sendos escritos polo que solicitaban a revisión das tarifas
• O actual goberno municipal deberá enfrontarse ao pago da dunha cantidade superior aos 100.000 euros ao perder o recurso contencioso administrativo

Teo (A Coruña), 21 de marzo de 2025.- O Concello de Teo deberá facerse cargo do pago dunha reclamación de algo máis de 100.000 euros en concepto de danos e prexuizos irrogados, debido á deixadez do anterior executivo local.

Así, en abril do ano 2013, o Concello de Teo suscribiu un contrato concesional para a xestión e explotación das piscinas municipais teenses coa empresa Aquafit Gestión S.L. por un período de oito anos. Este contrato foi prorrogado en marzo do ano 2021 por outros 14 meses, estando nestes momentos en precario como moitos outros contratos que o anterior executivo non arranxou.

Tal e como se recolle no contrato, o Concello tiña que actualizar as tarifas establecidas na ordenanza reguladora do prezo público polo servizo de piscinas de titularidade municipal, un feito que nunca se levou a cabo. Neste senso, a empresa actora presentou en maio de 2019 un escrito ante o Concello onde solicitaba a dita actualización e, en decembro do ano 2021, volveu a presentar outro escrito sen ter contestación algunha polo executivo local de aquel entón.

Ante esta situación, a entidade Aquafit Gestión S.L. interpuxo un recurso contencioso administrativo en febreiro do ano 2023 contra a desestimación por silencio administrativo das reclamacións deducidas en vía administrativa ante o Concello de Teo. Agora, o Xuzgado do Contencioso-Administrativo de Santiago de Compostela ditou sentenza e obriga, como non pode ser doutro xeito, ao Concello de Teo a pagar a dita cantidade.

Neste senso, o actual Goberno local quere deixar claro que non estaba informado deste procedemento e sinala que está traballando arreo para poñer ao día os máis de 18 contratos que se atopou en precario en xuño de 2023. Algúns deles xa están actualizados e outros se atopan aínda en fase de licitación, pero co obxectivo a medio prazo de ter todo regulado e conforme á lei.