Novo acto vandálico contra a campaña contra a violencia machista en Padrón
O Concello de Padrón denunciou un novo acto de vandalismo contra un dos sinais colocados nos centros escolares dentro da campaña de sensibilización polo Día Internacional para a Eliminación da Violencia contra as Mulleres (25N). Esta acción, que supón o segundo ataque deliberado a estes elementos, amosa a intolerancia e a falta de respecto cara á loita contra a violencia machista.
Líder Redacción
25 de noviembre de 2024 a las 16:33
Os sinais, parte dunha iniciativa do Concello e do CIM Terras de Iria, buscan concienciar sobre a grave realidade que afecta a miles de mulleres. Segundo cifras oficiais, no que vai de ano, 41 mulleres e 8 menores foron asasinados por violencia de xénero en España. «Danar ou arrincar un destes sinais significa ir en contra dos valores de igualdade e respecto que queremos promover como sociedade,» subliñou o goberno local.
Desde o Concello rexeitan rotundamente estes actos, que consideran un ataque non só contra a campaña, senón contra toda a comunidade padronesa comprometida cunha sociedade máis xusta e igualitaria. Ademais, reiteraron o seu compromiso coa sensibilización, asegurando que continuarán coa colocación e reforzo de sinalizacións e outras accións a prol da igualdade.
Finalmente, o Concello de Padrón fixo un chamamento á cidadanía para condenar este tipo de comportamentos e traballar conxuntamente por unha sociedade libre de violencias machistas.
