Infinita Viajes recibe un recoñecemento polo seu crecemento rápido e sostido
Infinita Viajes vén de sumar un importante recoñecemento ao seu proxecto empresarial ao ser distinguida como Empresa Gacela, un selo outorgado polo Informe Ardán en colaboración co Consorcio da Zona Franca de Vigo. Trátase dunha categoría reservada a compañías que destacan por manter un crecemento constante, rápido e moi superior á media nos ingresos de explotación, así como por demostrar un forte dinamismo e un marcado compromiso coa creación de emprego.
Líder Redacción
13 de noviembre de 2025 a las 12:34
Roberto Horta e Verónica Armesto, directores de Infinita Viajes
Segundo recolle o propio Informe Ardán, as empresas gacela caracterízanse por seren “pioneiras na adopción de novas tecnoloxías” e pola aplicación de “procesos innovadores no desenvolvemento da súa actividade”, elementos que forman parte do ADN de Infinita Viaxes desde a súa creación.
A directora do proxecto, que recibiu a noticia con especial emoción, lembraba os inicios da empresa “sentados no salón da casa” e destacaba o camiño percorrido ata consolidarse como referencia no sector. Agradeceu tamén o apoio do Consorcio Zona Franca de Vigo por este distintivo, así como o papel fundamental da súa “outra metade”, Roberto, do equipo de profesionais de Infinita Viajes e de toda a comunidade de viaxeiros infinitos.
“Cando vives no día a día da empresa ás veces perdes de vista todo o que avanzaches. Este recoñecemento danos folgos para seguir”, subliñou.
Infinita Viajes celebra así un novo impulso para continuar medrando no sector turístico con selo galego.
