Penúltima parada do Fala que Fala chega no CPI Dr. López Suárez de Friol
Friol acolle este xoves 16 de abril unha nova parada de “Fala que Fala”, o formato de Radio Líder que xa se consolidou como unha referencia na promoción do galego entre a mocidade. Tras o seu paso polo IES Luis Seoane de Pontevedra, o CPI Virxe da Saleta de San Cristovo de Cea, o IES Francisco Daviña Rey de Monforte de Lemos, o IES Cacheiras de Teo, o IES Castelao de Vigo e o IES O Ribeiro, en Ribavadia, o programa chega agora ao CPI Dr. López Suárez de Friol (Lugo) para celebrar a sétima e penúltima edición da tempada.
Líder Redacción
15 de abril de 2026 a las 23:12
O espazo, realizado en colaboración coa Secretaría Xeral da Lingua, emitirase entre as 10:00 e as 12:00 horas nunha edición especial chea de música, humor, entrevistas, xogos e unha destacada participación do alumnado. Durante dúas horas, o centro educativo converterase nun punto de encontro arredor da lingua galega, cunha proposta dinámica e participativa pensada para gozar, compartir e poñer en valor o noso idioma.
Nesta ocasión, o convidado será Rafa Casanova (Friol, 1982), un histórico do fútbol galego que colgou as botas hai tres anos despois de 32 anos en distintos equipos da nosa comunidade. É o presidente do Friol Club de Fútbol e o adestrador da S.D. Residencia na primeira Futgal. O deportista protagonizará unha das entrevistas do programa, realizada por parte do alumnado do centro.
Con esta nova cita, “Fala que Fala” continúa o seu percorrido por distintos puntos de Galicia, reforzando o seu papel como proxecto de referencia na difusión, promoción e prestixio do galego entre as novas xeracións.
O evento conta coa colaboración de Seguridade A1, Daveiga e Dezasete Media.
