Dodro aproba en pleno o inicio da licitación do Servizo de Axuda no Fogar

• A licitación aprobouse só cos votos a favor do PSdeG-PSOE, e o BNG. Unidade Veciñal de Dodro e Xente de Dodro votaron en contra desta licitación. A abstención do PP, posibilita a súa aprobación.

Dodro, 23 de marzo do 2025 – O Salón de Plenos de Dodro acolleu o pleno ordinario de marzo no que, entre outros temas, conseguiuse aprobar o proceso de licitación do Servizo de Axuda no Fogar, SAF, por un importe anual de mais de 660.000 €. Unha aprobación cos únicos votos favorables do PSdeG-PSOE e o BNG.

Tanto Unidade Veciñal de Dodro como Xente de Dodro votaron en contra. Xente de Dodro advertiu desde o primeiro momento que a súa norma é “votar en contra de todo”. Pola súa banda Unidade Veciñal de Dodro defendía unha municipalización que resulta imposible de asumir economicamente polo concello, entre outras razóns polo custo do persoal, segundo explicaron desde o equipo de goberno.

O Partido Popular optou pola abstención despois de reclamar nos últimos meses que se sacara adiante a licitación. Foi esta abstención, e o feito de que dos tres concelleiros da agrupación Xente  de Dodro só asistira o voceiro, a que posibilitou a aprobación.

A non aprobación de este procedemento tería sido un problema grave para os veciños e veciñas do concello, xa que suporía un parón nun dos servizos máis demandados no concello. Agora poderá comezar un proceso que rematará coa adxudicación do SAF.

Outros temas

O pleno aprobou tamén unha modificación de crédito e un recoñecemento extraxudicial de crédito, relacionados coa xestión e o pago do SAF. No apartado de mocións o BNG conseguiu o apoio da corporación para un recoñecemento ás cantareiras do municipio.