María Calvo Ares celebra os 100 anos convertida na única centenaria de Dodro
María Calvo Ares, veciña de O Campo, en Lestrobe, celebrou este sábado o seu cen aniversario, un fito que a converte na única persoa centenaria do concello de Dodro na actualidade.
Líder Redacción
24 de noviembre de 2025 a las 10:03
A homenaxeada recibiu a visita da concelleira de Servizos Sociais, Teresa Batalla, e do alcalde, Xabier Castro, que ademais exerceu de fotógrafo durante o encontro. Ambos quixeron trasladarlle persoalmente os parabéns da corporación municipal e recoñecer unha vida marcada polo esforzo, a familia e o arraigo á terra.
María compartiu esta xornada tan especial acompañada do seu fillo, das súas dúas netas e dunha das seis bisnetas, que non quixeron perder a celebración dun século de vida cheo de recordos e afectos.
O Concello de Dodro felicitou a María polo seu aniversario, destacando a alegría de poder celebrar unha data tan significativa cunha veciña tan querida no municipio.
