Cruces celebra a súa Feira do Galo de Nadal cun magnífico ambiente na Praza do Concello

• Luis Taboada, alcalde: “Esta feira é unha maneira de manter vivas as nosas raíces e de poñer en valor o traballo dos criadores e o saber facer de xeracións enteiras”
• Houbo unha animada degustación do galo, elaborada por restaurantes da zona, e música a cargo da agrupación Vai Nela de Salgueiros

Vila de Cruces, 22 de decembro de 2025 (Vía Láctea Comunicación).- O Concello de Vila de Cruces celebrou hoxe a XXVI Feira de Nadal do Galo de Curral na Praza Juan Carlos I (Praza do Concello). O alcalde Luis Taboada inaugurou a xornada, acompañado polo delegado territorial da Xunta en Pontevedra, Agustín Reguera; o xefe territorial de Medio Rural en Pontevedra, Antonio Crespo; o alcalde de Touro, Jesús Reboredo; así como representantes do Concello de Boqueixón.

Luis Taboada sinalou que a Feira do Galo de Nadal é xa unha cita imprescindible onde “celebramos o mellor da nosa terra”, enxalzando a gastronomía e a tradición e tendo como protagonista indiscutible ao galo de curral, un produto único, criado con coidado, tempo e respecto, sinónimo de calidade e identidade. “Esta feira é unha maneira de manter vivas as nosas raíces e de poñer en valor o traballo dos criadores e criadoras e o saber facer de xeracións enteiras”, manifestou.

A carpa encheuse de espírito navideño, creando un magnífico ambiente no que gozar da degustación gratuíta do galo, con elaboracións realizadas polos cociñeiros de oito establecementos locais de restauración: A de Rafael, O Galicia, Onde Antonio Mouriscade, Casa San Martín, Casa Don Din, O Refuxio, Álex Iglesias e O Pazo. Ademais, a veciñanza e os visitantes puideron mercar o galo xa morto para levar para á casa e degustalo nas súas mesas de Nadal. A xornada contou coa actuación da agrupación Vai Nela de Salgueiros, que puxeron ritmo e música durante toda a mañá.

Finalmente, a tenente de alcalde de Cruces, Mireya Otero, agradeceu a colaboración da Asociación de Criadores de Galo de Curral de Vila de Cruces polo “importante labor que desenvolven ao longo do ano”, e a participación dos restaurantes locais e tamén da agrupación Vai Nela de Salgueiros, facéndolles entrega dun detalle como mostra de recoñecemento do Concello.