Capitol estrea nova imaxe con motivo do seu 90º aniversario
Santiago de Compostela, 19 de marzo de 2025 – A histórica sala Capitol celebrou hoxe o seu 90º aniversario cunha presentación especial que destacou a súa relevancia como espazo cultural en Santiago e revelou a nova imaxe gráfica conmemorativa, creada pola ilustradora galega Rebeca Losada. O evento contou coa presenza de diversas personalidades do mundo da cultura e a política, quen compartiron lembranzas e desexos para o futuro da emblemática sala.
Líder Redacción
19 de marzo de 2025 a las 19:06
Unha historia que forma parte da cidade
«Capitol é un espazo que forma parte da memoria de moitas xeracións», expresou Santi, un dos responsables da sala, durante o acto. «Se vos digo Capitol, todos tedes unha película, un concerto ou unha noite de disco na mente». A sala, inaugurada en 1935 como cine, proxectou a súa primeira película, Casta Diva, e desde entón formou parte do panorama cultural compostelán, evolucionando de cinema a sala de concertos e eventos.
A concelleira de Festas, Pilar Lueiro tamén compartiu as súas lembranzas: «A miña primeira experiencia aquí foi con nove anos vendo Karate Kid. A emoción de ver unha película na gran pantalla era indescritible. Despois, co paso dos anos, volvín para concertos, teatro e momentos inesquecibles».
O evento tamén contou coa participación de Jacobo Sutil, director da Axencia Galega das Industrias Culturais (AGADIC), quen resaltaron a importancia de Capitol como referente cultural, coa presenza de Valentín García, secretario xeral da Lingua da Xunta de Galicia.
Un cartel que une cine e música
Un dos momentos máis esperados do evento foi a presentación do cartel conmemorativo do 90º aniversario, obra de Rebeca Losada. A ilustradora, emocionada por participar neste proxecto, destacou o reto de plasmar a esencia da sala: «Cando me chegou a proposta, dixen que si de inmediato. Todos os composteláns teñen unha película na cabeza cando se fala de Capitol. A idea foi crear unha pandilla de personaxes icónicos do cine, cun espírito aventureiro ao estilo dos Goonies, mesturando ese pasado cinematográfico co presente musical da sala».
O deseño, que combina referencias a filmes clásicos coa icónica fachada do Capitol, busca espertar a nostalxia do público e celebrar a longa traxectoria do espazo. «Foi un traballo divertido, pero tamén houbo debate sobre que personaxes incluir. Todos tiñamos os nosos favoritos!», confesou Santi entre risas.
O evento pechouse cun brinde polo futuro da sala. «Celebramos os primeiros 90 anos e esperamos que veñan moitos máis. A nosa misión é manter Capitol como un faro cultural de Santiago», afirmou Santi.
Pilar Lueiro sumouse a este desexo: «Brindemos pola Capitol, pola súa historia e pola súa contribución á nosa cultura. Que os próximos 90 anos sexan tan emocionantes como os que celebramos hoxe».
A celebración do aniversario continuará con diversos eventos ao longo do ano, reafirmando o compromiso de Capitol coa escena cultural galega. Como di a canción de De Ninghures, «Miña nai xa mo dicía, todo o día, rodea de melodías e boa xente a túa vida». Longa vida a Capitol!
