Begoña Balado, concelleira de Turismo: “A II BTT Arzúa Destino Verde foi unha festa do cicloturismo”

Balado destacou que esta segunda edición “foi un éxito” e subliñou que o bo tempo tamén contribuíu a que os participantes desfrutasen aínda máis da experiencia. A edil puxo en valor as novidades incorporadas este ano, como a Mini BTT e as actividades para a cativada, así como a nova distancia intermedia de 49 quilómetros, creada para abrir a proba a máis públicos e niveis.

A concelleira explicou que moitas das melloras desta edición chegaron a partir das recomendacións realizadas polos propios participantes na primeira convocatoria. “Fomos mellorando entre a organización e o Concello e estamos encantados porque foi realmente unha festa do ciclotuismo”, sinalou.

Begoña Balado destacou tamén a boa resposta dos participantes ás tres rutas propostas —de 32, 49 e 70 quilómetros— e asegurou que recibiron valoracións moi positivas sobre os percorridos e sobre as paisaxes do municipio.

Durante a entrevista, a responsable de Turismo lembrou que a filosofía da BTT Arzúa Destino Verde pasa por combinar deporte, natureza e promoción do territorio. “Era un xeito de ensinarlle aos participantes o que realmente temos en Arzúa”, afirmou, facendo referencia aos espazos naturais e aos recunchos verdes do municipio.

A edil confirmou ademais que o Concello xa traballa na terceira edición da proba, coa intención de seguir mellorando e incorporando novas iniciativas. “Non imos perder a esencia. Queremos seguir sorprendendo e facendo medrar esta festa do cicloturismo”, concluíu.