Arzúa prepárase para converterse no epicentro comarcal do eclipse total de sol

A Concellería de Turismo do Concello de Arzúa xa está a traballar na organización dunha programación especial arredor desta cita histórica, coa vontade de ofrecer unha experiencia aberta, divulgativa e pensada para todos os públicos. A concelleira de Turismo, Begoña Balado, destaca a importancia do evento para o municipio: “Estamos ante unha oportunidade histórica. Arzúa está nunha posición privilexiada para vivir o eclipse total e queremos que sexa unha experiencia compartida por veciños, peregrinos e visitantes”.

O punto elixido para a observación será a parroquia de Santa María, no Campo da Festa, un espazo amplo, cómodo e estratéxico, situado preto do núcleo urbano. Esta localización facilitará a participación cidadá e permitirá acoller con garantías ás persoas que se acheguen desde distintos puntos da comarca.

Segundo explica Balado, a elección deste emprazamento responde a criterios tanto técnicos como sociais: “O Campo da Festa é un lugar ideal para a observación: aberto, accesible e moi próximo ao centro de Arzúa, o que nos permite garantir comodidade e seguridade para todas as persoas asistentes”.

Ademais da propia observación do eclipse, o Concello prevé organizar unha xornada con obradoiros e talleres de divulgación astronómica, pensados para todos os públicos, cun enfoque didáctico e familiar. “Queremos que o eclipse sexa tamén unha oportunidade para aprender, para espertar a curiosidade científica e para gozar da astronomía dunha forma próxima e amena”, sinala a concelleira.

Desde a Concellería de Turismo sublíñase tamén o papel de Arzúa como punto comarcal estratéxico para vivir este fenómeno único, tanto pola súa localización como pola capacidade de acollida do municipio e a presenza constante de peregrinos do Camiño Francés. “Arzúa ten todo para converterse no lugar de referencia da comarca para vivir o eclipse. É un evento que vai máis alá dun momento puntual e que pode ter un impacto moi positivo a nivel turístico e social”, engade Balado.

A Concellería de Turismo do Concello de Arzúa anunciará en breve a programación completa, así como os detalles das actividades previstas e as recomendacións necesarias para unha observación segura do eclipse total de sol.