Arzúa anima ao comercio local a sumarse ao programa MercaNaVila da Deputación da Coruña

Arzúa, 6 de outubro de 2025.- A área de Comercio e Turismo do Concello de Arzúa fai un chamamento a todo o tecido comercial do municipio para que se sume ao novo programa MercaNaVila, impulsado pola Deputación da Coruña e presentado oficialmente esta mañá polo presidente provincial, Valentín González Formoso, acompañado polo presidente da Federación Galega de Comercio, José María Seijas, e polas deputadas provinciais Avia Veira e Rosa Ana García.

O plan, dotado cun orzamento de 6 millóns de euros, está dirixido aos concellos de menos de 20.000 habitantes co obxectivo de reactivar a economía do rural, dinamizar as pequenas tendas e apoiar a modernización do sector comercial de proximidade. A través dunha aplicación móbil, todas as persoas maiores de 18 anos poderán acceder a bonos de ata 100 euros en descontos para compras nos establecementos adheridos.

Segundo explicou o presidente da Deputación, González Formoso, o comercio local “estrutura as vilas galegas e precisa apoio ante os cambios tecnolóxicos e sociais que están a afectar aos hábitos de consumo”. Pola súa parte, a deputada Avia Veira destacou que programas coma este “axudan a fixar poboación e xerar novas oportunidades económicas no rural”, mentres que o presidente da Federación Galega de Comercio, José María Seijas, celebrou a colaboración institucional lembrando que “o comercio é a vida das vilas”.

Unha oportunidade clave para Arzúa

Desde a área de Comercio e Turismo do Concello de Arzúa, a edil responsable Begoña Balado aplaudiu esta iniciativa e animou a todos os establecementos locais a inscribirse no programa antes do 20 de outubro a través da web oficial mercanavila.gal.

“Trátase dunha oportunidade moi importante para dinamizar as vendas, fidelizar a clientela e reforzar o valor do comercio de proximidade, que é esencial para manter vivas as nosas rúas e a nosa economía local. Ademais, encaixa perfectamente con outras campañas que vimos desenvolvendo desde o Concello, especialmente nas épocas de outono e Nadal, que son estratéxicas para o pequeno comercio”, sinalou a concelleira.

A responsable municipal tamén lembrou que o comercio de proximidade “é moito máis ca un punto de venda: é servizo, é trato humano, é calidade e forma parte da identidade e da vida diaria de cada vila. Por iso convidamos a todos os comercios de Arzúa a sumarse a MercaNaVila e aproveitar esta ferramenta que suporá un impulso directo para o noso sector comercial”.

Inscricións abertas

Os establecementos interesados xa poden realizar a súa inscrición en mercanavila.gal, onde atoparán toda a información sobre o funcionamento do programa, os prazos e os requisitos de participación. O prazo permanecerá aberto ata o 20 de outubro, e a previsión é que os bonos poidan comezar a empregarse nas vindeiras semanas, coincidindo co arranque da campaña de outono.

Con esta adhesión, Arzúa busca reforzar o compromiso co seu tecido empresarial local, ofrecendo novas ferramentas que contribúan a mellorar a competitividade das tendas e a consolidar a súa posición como un motor económico fundamental para o municipio.