Arrincan as votacións dos Benfeito 2025: a cidadanía decide as mellores marcas galegas

• De carácter bianual, estes recoñecementos distinguen a excelencia, a innovación e o compromiso coas persoas consumidoras das empresas asentadas en Galicia
• As votacións xa están abertas e a cidadanía decidirá as empresas gañadoras en tres categorías: Produtos Alimenticios, Servizos e Produtos Non Alimenticios
• Premios impulsados pola Unión de Consumidores de Galicia (UCGAL)

Santiago de Compostela , 22 de setembro de 2025.- A Unión de Consumidores de Galicia (UCGAL) abre as votacións da segunda edición dos Premios Benfeito de Consumo, uns premios bianuais que recoñecen a excelencia, a innovación e o compromiso coas persoas consumidoras das empresas asentadas en Galicia.

A UCGAL convida á cidadanía a participar no proceso de votación a través dos seus canles oficiais para que os Premios Benfeito de Consumo reflictan, un ano máis, a opinión real dos galegos e galegas. Entre todas as persoas que emitan o seu voto e completen a enquisa sortearanse dúas cestas de produtos galegos valoradas en 100 € cada unha.

Nesta edición, as candidaturas preséntanse en tres categorías. En Produtos Alimenticios compiten Gadis, Coren, Leite Río, Pescanova e Viña Costeira; en Servizos, as finalistas son Xenera, Monbus, Caixa Rural, Be One e Alda Hotels; e en Produtos Non Alimenticios optan ao premio Pérez Rumbao, Bimba y Lola, Cocinas Santos, NUMAX e Sargadelos.

A lembranza da primeira edición, celebrada en 2023, sitúa o listón alto: Estrella Galicia acadou o recoñecemento en Produtos Alimenticios; Naviera Mar de Ons impúxose en Servizos; e Droguerías Arenal foi distinguida en Produtos Non Alimenticios.

Coa súa segunda edición, os Premios Benfeito de Consumo consolídanse como unha cita bianual de referencia en Galicia, chamada a fixar estándares de calidade e responsabilidade no mercado. Estes premios fortalecen unha plataforma estable de visibilización de boas prácticas, achegan evidencias que orientan a toma de decisións públicas e privadas e reforzan a confianza entre o tecido empresarial e a cidadanía. A súa continuidade reafirma o compromiso da UCGAL cun marco duradeiro de diálogo e corresponsabilidade entre empresas, entidades e as asociacións que representan ás persoas consumidoras.