Aprobada a rehabilitación da Torre do Reloxo da Catedral de Santiago por 1,7M€

O proxecto, redactado polos arquitectos Óscar e Iván Andrés Quintela, desenvolve as seguintes intervencións: restauración de toda a fábrica pétrea, tanto no exterior como no interior, incluíndo puntualmente reforzos estruturais; restauración das pinturas sobre a fábrica de pedra, como as existentes nas esferas exteriores do reloxo e nos zócolos interiores, así como das pinturas sobre a madeira da caixa da maquinaria; rehabilitación do espazo interior para facilitar o acceso a todos os niveis da torre, reparando estruturas de madeira e substituíndo as deterioradas ou descontextualizadas; reparación ou substitución da carpintería exterior e interior dos ocos por novos elementos de madeira e inclusión de novas carpinterías acristaladas resoltas con perfís de aceiro; execución dunha nova estrutura de madeira para soster a campá principal, substituíndo a metálica existente; reparación da maquinaria do reloxo e do mecanismo de golpeo das campás; e execución dunha nova instalación eléctrica e de iluminación en toda a torre.

O proxecto enmárcase no Plan director do conxunto da Catedral, aprobado pola Xunta de Goberno o 27 de outubro de 2009; conta co informe favorable da Dirección Xeral de Patrimonio Cultural (04.03.2025) e co ditame favorable da Comisión Asesora do Patrimonio Histórico do Plan especial PE-1 (04.02.2025).

Outros asuntos 

Na mesma sesión da Xunta de Goberno aprobouse o expediente que ten por obxecto a licitación do Servizo de mantemento do software de xestión integral de usuarios de Servizos Sociais cun orzamento base de licitación de 66.598,40 € (base impoñible de 56.918,40 € máis IVE do 21% de 9.680,00 €) e coa seguinte desagregación: 2.371,60 € (2025); 38.139,20 € (2026); 26.087,60 € (2027).

Este software permite a xestión integral dos servizos sociais comunitarios a través dunha serie de módulos totalmente configurables e que aglutinan a totalidade dos traballos que se realizan no ámbito da área social. Inclúe, tamén, o soporte ás peticións que desde os servizos sociais se realizan para adecuar a ferramenta ás súas necesidades e á lexislación vixente, así como a mellora da integración con outras ferramentas municipais. Ábrese agora un procedemento negociado sen publicidade de adxudicación.

Tamén se aprobou o convenio de colaboración entre o Concello de Santiago de Compostela e a Asociación do Traxe Galego por importe de 20.000 euros. A actividade obxecto do convenio é a celebración do 30 aniversario da asociación, que comprende unha exposición de indumentaria popular galega, unhas xornadas arredor do traxe, faladoiros e obradoiros celebrados en centros cívicos e culturais de Santiago, unha actividade titulada ‘O traxe para os peques’ e unha exposición de cartaces e fotografías.

Na mesma sesión autorizouse a revisión de prezos do contrato mixto de subministración e servizos enerxéticos do alumeado público exterior, solicitada pola UTE SANTIAGO  ALUMBRADO, adxudicataria deste contrato segundo o acordo da Xunta de Goberno do 11 de abril de 2023.

De acordo con isto, o canon redúcese en 8.844,32 euros mensuais ou 106.131,89 € ano, IVE incluído, con efectos dende o 1 de novembro de 2024 e ata o 31 de outubro de 2025, durante o segundo ano de execución do contrato.