A S.R. Calo impulsa un equipo de fútbol inclusivo pioneiro na comarca
A Sociedade Recreativa Calo, entidade con máis de 60 anos de historia no Concello de Teo, está a vivir un momento de crecemento e innovación grazas a proxectos deportivos e culturais que fomentan a inclusión e a solidariedade. Coordinada por Manuel Buján, a entidade destaca polo seu compromiso con valores que transcenden o ámbito puramente deportivo.
Líder Redacción
23 de diciembre de 2024 a las 20:06
Un dos proxectos máis destacados da Sociedade Recreativa Calo é a creación dun equipo de fútbol 8 para persoas maiores de 13 anos con discapacidade, que participa nunha competición impulsada pola Federación Galega de Fútbol, coñecida como A Nosa Champions. Segundo explicou Manuel Buján, o proxecto xurdiu grazas á colaboración con entidades como Aspas e co apoio de dous monitores formados, Marcos Mella e Rubén Bello, xogadores do primeiro equipo do club.
Con nove xogadores iniciais, este equipo converteuse no primeiro da súa categoría en toda a delegación de Santiago, ofrecendo unha oportunidade única a persoas que, ata agora, non tiñan opcións de practicar fútbol nunha contorna adaptada ás súas necesidades. “É unha iniciativa cargada de humanidade e unha mostra de que o fútbol pode ser para todos,” sinala Buján.
Outro dos grandes eventos organizados pola Sociedade Recreativa Calo é a primeira edición da San Silvestre Solidaria, que se celebrará o 28 de decembro ás 16:30 no campo de Rebordelo. A recadación destinarase á Fundación Andrea, unha entidade que apoia ás familias con nenos afectados por enfermidades graves. Cunha inscrición de cinco euros, tres serán doados directamente á fundación.
O percorrido, de catro quilómetros, está deseñado para ser accesible e divertido, ideal para familias e mascotas. Ademais, ao finalizar a carreira, os participantes gozarán de rosca e chocolate. A organización conta xa con máis de 225 inscritos e aspira a converter esta actividade nunha cita anual no calendario local.
A Sociedade Recreativa Calo non se limita ao ámbito deportivo. Baixo a súa estrutura directiva, presidida por Elsa Gómez, a entidade promove iniciativas culturais como a banda de gaitas, a banda de música e a Escola Oficial de Música.
A Sociedade Recreativa Calo amosa que o deporte e a cultura poden ser ferramentas transformadoras para fomentar a inclusión e a solidariedade. Con iniciativas como o equipo Genuine e a San Silvestre solidaria, esta entidade está a converterse nun referente na comarca, demostrando que pequenos xestos poden xerar un impacto significativo na sociedade.
Tes a entrevista completa, no seguinte enlace.
