A rehabilitación do pazo do Martelo en Rianxo rematará en outubro, no prazo acordado co Ministerio

• O alcalde de Rianxo e o concelleiro de Obras visitaron o edificio acompañados polo representante da empresa que executa as obras
• A reforma, que trata de recuperar a estrutura orixinal do pazo, foi adxudicada en 1,4 millóns euros e conta cunha subvención dun millón da Unión Europea
• Julián Bustelo: “O Goberno central concedeunos un mes de prórroga e xa temos parte da xustificación presentada, como nos indicaron os técnicos do ministerio”

Rianxo. 19-10-2024.- As obras de rehabilitación do pazo do Martelo, que tratan de recuperar a estrutura orixinal do edificio ademais de mellorar a súa eficiencia enerxética e accesibilidade, rematarán a vindeira semana. Así llo trasladou o encargado da obra da empresa Sergonsa ao alcalde de Rianxo, Julián Bustelo, e ao concelleiro de Obras, Alberto Angueira, na visita que fixeron ao edificio esta semana.

Julián Bustelo recorda que a obra rematará no prazo sinalado polo Ministerio de Transportes, Mobilidade e Axenda Urbana, “que nos concedeu un mes de prórroga para acabar a reforma e xustificar a subvención dun millón de euros antes do 31 de outubro”. O alcalde engade que hai uns días técnicos do ministerio estiveron explicando como xustificar esta subvención a través da plataforma habilitada, “e xa temos entregada parte desa documentación”.

A rehabilitación integral do pazo do Martelo foi adxudicada en 1.410.912,03 euros e conta cunha subvención de 978.709,98 euros da Unión Europea a través do PIREP (Programa de impulso á rehabilitación de edificios públicos) do Ministerio.

O alcalde resalta que, “para unha obra destas características, que supuxo a rehabilitación integral dun edificio histórico adquirido polo concello en 1973, ter so un mes de retraso demostra que se están facendo ben as cousas. Por iso poderemos xustificar a subvención en tempo e forma”, engade Julián Bustelo.

A rehabilitación integral do pazo do Martelo ten por finalidade evitar os graves problemas de filtración de auga que estaban a deteriorar o edificio, e recuperar a estrutura orixinal do mesmo, despois da reforma acometida nos anos oitenta, polo que agora tamén se eliminaron os balcóns da fachada que da á ría para recuperar a parede branca con ventás. O proxecto inclúe importantes melloras de eficiencia enerxética e de accesibilidade deste pazo que se levantou a finais do século XVII e principios do XVIII.

O interior do edificio foi derrubado integramente e reconstruído de novo, con dous andares diáfanos. Nestes momentos estase a colocar o chan no andar superior, no que está previsto volver colocar a biblioteca municipal, habilitar postos de investigación e unha zona de lectura máis ampla.

O andar inferior, que está a altura da praza Rafael Dieste, contará cunha estancia diáfana con acceso as dúas fachadas do edificio, entre outros servizos.