A lei avala o proxecto da planta en Cacheiras mentres o Concello propón ubicala no futuro polígono industrial

Durante o pleno, deuse voz a unha representante da plataforma veciñal contraria á iniciativa, aínda non constituída formalmente, que trasladou a preocupación existente entre residentes da zona pola posible implantación da planta.

A alcaldesa detallou o estado do expediente e lembrou que o proxecto conta cunha autorización da administración autonómica. A rexedora insistiu en que o goberno municipal “sempre estivo ao carón da veciñanza” e reiterou que, de depender exclusivamente do executivo local, a localización da planta trasladaríase ao futuro polígono industrial e non ao emprazamento actual.

En relación coa tramitación administrativa, a alcaldesa explicou que o Concello optou por non responder ao requirimento da Xunta de Galicia, que solicitaba un informe de viabilidade urbanística da parcela. Segundo indicou, esta estratexia buscaba provocar o arquivo do procedemento, en liña con actuacións similares realizadas noutros casos, como o da canteira de Casalonga.

Porén, desde o punto de vista legal, o arquitecto municipal subliñou durante a sesión que a normativa autonómica é clara. En concreto, a Lei Galega do Solo, no seu artigo 35 relativo aos usos en solo rústico, permite instalacións para a xestión e tratamento de residuos inertes neste tipo de terreos. O técnico municipal avalou así as explicacións ofrecidas pola alcaldía.

Ademais, o goberno local destacou que os informes emitidos pola administración autonómica foron elaborados por persoal técnico funcionario con responsabilidade xurídica, conforme á lexislación vixente.

No ámbito ambiental, a Xunta estableceu unha serie de condicións para garantir o correcto desenvolvemento da actividade, incluíndo medidas correctoras. Segundo se indicou, a empresa promotora leva máis de dúas décadas desenvolvendo actividades industriais.