A fibra óptica chega a novas parroquias de Arzúa tras un ano de traballo
Arzúa, 24 de abril de 2025 – O Concello de Arzúa continúa a avanzar na mellora da conectividade no rural. Un ano despois do inicio das actuacións para o despregamento da fibra óptica, o servizo de internet de alta velocidade está xa operativo en boa parte do municipio, facilitando o acceso á rede a moitas veciñas e veciños que antes carecían deste recurso fundamental.
Líder Redacción
25 de abril de 2025 a las 18:22
As actuacións levadas a cabo permitiron ofrecer servizo en diversas parroquias como Dodro, O Campo, Couto, Calvos, Viladavil, Viños e Branzá, mellorando as condicións de vida e facilitando o acceso ao teletraballo, á educación, á comunicación e á conexión da industria gandeira, un dos motores económicos da comarca.
A pesar destes avances, aínda existen vivendas e zonas máis illadas nas que o servizo non está dispoñible. O Concello está a traballar para ampliar progresivamente a rede de fibra óptica e garantir que ninguén quede atrás.
“Estamos moi satisfeitos cos avances que se conseguiron este último ano. A fibra óptica é hoxe un servizo básico, que permite traballar, estudar ou simplemente manter o contacto co mundo. O noso compromiso é claro: queremos que todas as parroquias conten cun acceso digno a internet”, declarou Daniel Moscoso Sixto, concelleiro de Xuventude, Infancia e Novas Tecnoloxías.
Desde o Concello valórase positivamente a colaboración coas empresas instaladoras e coas administracións competentes para superar os desafíos técnicos e asegurar unha implantación eficaz.
A conectividade dixital do rural é unha prioridade estratéxica deste goberno, convencido de que a igualdade de dereitos e oportunidades tamén pasa por garantir o acceso a servizos tecnolóxicos de calidade en todo o municipio.
