A Estrada ampliará a EDAR de Aguións, ao límite da súa capacidade
O Concello da Estrada asumirá a redacción do proxecto para a ampliación da Estación Depuradora de Augas Residuais (EDAR) de Aguións, unha infraestrutura inaugurada no ano 2005 e que na actualidade se atopa ao límite da súa capacidade. Así o confirmou o alcalde, Gonzalo Louzao, tras a reunión mantida na tarde do xoves coa conselleira de Medio Ambiente e Cambio Climático, Ángeles Vázquez.
Líder Redacción
12 de diciembre de 2025 a las 14:50
O rexedor explicou que a depuradora estradense está infradimensionada, non só polo crecemento da poboación urbana, senón tamén porque terá que asumir proximamente os efluentes procedentes da ampliación do polígono industrial de Toedo. “Dada a previsión de incremento do casco urbano e tamén do propio polígono, a EDAR está infradimensionada e temos que planificar a súa ampliación pensando en mellorar o servizo”, sinalou Louzao, recoñecendo que se trata dunha problemática que se vén arrastrando dende hai anos.
No encontro coa conselleira, esta amosouse receptiva á demanda municipal e acordouse que o Concello encargará a elaboración do proxecto a unha enxeñaría especializada. Unha vez redactado, o documento será remitido a Augas de Galicia para a súa avaliación. O alcalde indicou tamén que será o propio proxecto o que permita cuantificar o investimento necesario, tanto para ampliar a capacidade da planta como para renovar tecnoloxicamente unhas instalacións con dúas décadas de funcionamento.
A ampliación da EDAR de Aguións abordarase no marco dun convenio de colaboración entre a Xunta de Galicia e o Concello da Estrada, correspondendo á administración autonómica a licitación das obras. Esta cooperación inscríbese no apoio técnico e económico que a Xunta presta aos concellos para garantir unha prestación máis eficiente dos servizos de saneamento e abastecemento.
Dende a Consellería de Medio Ambiente lembraron que este apoio, canalizado a través de Augas de Galicia, traducirase nos 12,6 millóns de euros recollidos nos orzamentos autonómicos de 2026 para distintas liñas de axudas dirixidas principalmente ás entidades locais.
Á reunión, na que tamén se abordaron outras necesidades e proxectos para o municipio, o alcalde acudiu con documentación que acredita que a EDAR de Aguións foi concibida para dar servizo a uns 10.000 habitantes, unha cifra que a poboación urbana xa está a rozar e que se verá superada coa incorporación das augas residuais da nova fase do principal parque empresarial da Estrada.
