A concellería de Turismo lanza “Arzúa Camiña”: sete rutas guiadas para coñecer os segredos do Destino Verde
A iniciativa desenvolverase entre xuño e outubro e permitirá coñecer a paisaxe, a historia e o patrimonio natural do concello cun ciclo de andainas, abertas e de balde, con inscrición previa obrigatoria
Líder Redacción
2 de junio de 2025 a las 14:12
Arzúa, 02 de xuño de 2025.- A Concellaría de Turismo do Concello de Arzúa vén de poñer en marcha o programa “Arzúa Camiña”, unha nova iniciativa que convida a veciñanza e áspersoas visitantes a descubrir o territorio a través de sete rutas a pé, guiadas, de balde e adaptadas a diferentes niveis físicos. As andainas realizaranse en diferentes sábados entre os meses de xuño, agosto, setembro e outubro, e servirán para percorrer algúns dos lugares con máis encanto e riqueza natural do municipio.
As andainas partirán dende distintas zonas do municipio, e estarán conducidas por un guía especializado que achegará información sobre a contorna, a historia local e o patrimonio natural e cultural de cada zona. Para participar é necesario inscribirse previamente na oficina de Turismo (Praza do Peregrino s/n), no teléfono 981 50 80 56 ou no correo info@turismoarzua.gal, xa que as prazas son limitadas.
A concelleira de Turismo, Begoña Balado, sinala que “Arzúa Camiña é unha proposta que nace coa vontade de promover o coñecemento do noso territorio a través do sendeirismo, poñendo en valor a paisaxe, a contorna e o patrimonio natural e cultural. Queremos que a xente camiñe, que goce e que descubra o noso concello”.
Calendario de andainas
O ciclo comezará o sábado 14 de xuño cunha ruta polo sendeiro das Corredoiras, que partirá Praza de Galicia. Trátase dun percorrido de 15 quilómetros, cun nivel de dificultade media.
A segunda cita será o 28 de xuño por Fonte Santa, unha ruta de 12,3 quilómetros e dificultade media, que sairá dende a capela de Fonte Santa. Esta andaina conta cun nivel de dificultade media.
O 30 de agosto realizarase a terceira andaina do ciclo, que comezará na ermida da Mota e conta cunha distancia de 11 quilómetros e dificultade baixa.
O programa continuará o 13 de setembro polo val do Iso, de 12 quilómetros e dificultade baixa, con saída dende a Praza de Galicia.
A quinta andaina celebrarase o 27 de setembro pola ruta da fervenza das Hortas, cun percorrido de 17,5 quilómetros e dificultade media.
A seguinte será o día 11 de outubro, polo Camiño Francés: Boente – A Calzada. Partirá dende Boente, terá unha lonxitude de 14 quilómetros e un nivel de dificultade media.
Finalmente, o ciclo pecharase o sábado 25 de outubro cunha ruta polo embalse de Portodemouros, que sairá dende o embalse. Terá unha distancia de 12,5 quilómetros e
dificultade media.
“Arzúa Camiña” forma parte da aposta do Concello de Arzúa por un modelo de turismo sostible, activo e de calidade, enmarcado na estratexia do Destino Verde, que busca promocionar os valores naturais e culturais que definen a identidade do municipio.
