A alianza entre BNG e PP faille perder ao Concello de Padrón 100.000 € do POS+ para gasto corrente

• Só existe un precedente en toda Galicia no que se votara en contra de recibir recursos do Plan de Obras e Servizos da Deputación.
• Por primeira vez na historia de Padrón rómpese a dinámica política de apoiar fondos da Deputación.
• O resultado do último pleno de Padrón confirma a alianza entre o PP e o BNG

Padrón. 12-9-2024.- O Concello de Padrón vai perde 93.595,17 euros para gasto corrente do POS+ Adicional da Deputación da Coruña porque no pleno extraordinario deste xoves o PP e BNG votaron en contra da proposta do equipo de goberno.

O alcalde, Anxo Arca, lamentou tanto a decisión como as formas dos voceiros da oposición, que se uniron para que Padrón perdese uns recursos absolutamente necesarios para o mantemento dos servizos e infraestruturas públicas municipais.

Durante o pleno o alcalde preguntou a BNG e PP en que axuda a súa actitude ao progreso de Padrón, e recordoulles a ámbolos dous partidos que o PSdeG-PSOE nunca votou en contra dos recursos aportados pola Deputación. “É a primeira vez na historia que se tumba a recepción de fondos para o Concello”, asegurou o alcalde. Queda clara a alianza existente entre PP e BNG que, nesta ocasión, só serviu para que a cidadanía padronesa conte con menos recursos para as melloras que necesita o municipio.

“Queda claro quen está neste momento loitando por acadar un Padrón mellor e quen só se centra en poñer impedimentos ao progreso do noso pobo”, afirmou o alcalde, que valorou de xeito especialmente negativo a primeira intervención dos tres concelleiros populares que acaban de tomar posesión das súas actas. “Chegar ao pleno de Padrón e que a súa primeira intervención sexa privar ao pobo de 100.000 euros para o seu desenvolvemento é absolutamente vergonzoso. Un retorno memorable do señor Rodríguez Conde”, afirmou Anxo Arca.

Pensando no futuro do mandato o alcalde avoga por recompoñer as canles de negociación co BNG sempre que se realicen “nun ton de cordialidade e xenerosidade mutua, centrados no ben do pobo, sen erguer a voz”.

Está por ver se o BNG se abre a apoiar ao goberno padronés ou se avanzará na súa relación co Partido Popular ata acadar unha moción de censura. Entre tanto, mentres a situación se aclara, “o goberno socialista de Padrón continuará traballando arreo como leva facendo ata agora para que o pobo continúe no bo camiño e acade as mellores fontes de financiación”, asegurou Anxo Arca.