A Estrada imporá sancións aos madeireiros tras os cuantiosos danos nas vías públicas

• Os camiños estragados por vehículos pesados que retiran a madeira nos montes chegaron a impedir en Frades o paso dos equipos de extinción para intervir ante un recente incendio forestal.
• “Entendemos que a retirada ten que facerse por estas pistas, pero as empresas teñen a obriga de deixalas no estado orixinal”, di o alcalde.
• A Policía Local está facendo xa os correspondentes informes e tentará identificar ás empresas que traballan ou traballaron nas zonas nas que se rexistraron danos.

A Estrada, 4 de abril de 2025.- O Concello da Estrada comezará a aplicar rigorosamente a ordenanza municipal e esixirá aos madeireiros que soliciten ante a administración local o pertinente permiso de actividade e depositen o aval requirido cando traballan na corta e retirada de madeira nos montes do termo estradense. A contundencia no proceder da institución perante as empresas que executan estes traballos emana do malestar existente entre a veciñanza e no propio executivo ante os cuantiosos danos ocasionados en vías públicas do municipio polos vehículos pesados que se empregan para a retirada da madeira das fincas.

A situación chegou hai uns días ao extremo na parroquia estradense de Frades. Tras orixinarse un incendio forestal, a desesperación dos efectivos terrestres de extinción fixo saltar todas as alarmas: os medios non podían chegar ao foco porque as pistas estaban completamente intransitables e impedían avaliar a posibilidade de que as lapas se achegasen ás vivendas.

“Imos a aplicar a ordenanza e imos ser duros. Vai haber sancións”, sinalou o alcalde, Gonzalo Louzao. O rexedor trasladou o profundo malestar dos veciños, cansos de que os camiños forestais que utilizan queden completamente estragados despois dos traballos para a extracción da madeira das fincas. “Entendemos que a retirada, loxicamente, ten que facerse por estas pistas, pero as empresas teñen a obriga de deixalas no estado orixinal”, recalcou o mandatario estradense. Asumiu que os prazos dos requirimentos de limpeza das fincas están ocasionando nestes intres unha densidade maior de madeireiros traballando nos montes da Estrada, pero puxo o acento en que isto non é motivo para que as vías queden seriamente deterioradas e con total impunidade para quen ocasiona estes danos, recaendo as consecuencias sobre os veciños usuarios e o custe de reparación sobre as arcas públicas.

O alcalde informou de que unha patrulla da Policía Local estase desprazando xa a facer inspección nas zonas nas que se detectaron problemas nas pistas, caso de Frades. Os axentes elaborarán o correspondente informe e tentarán identificar ás empresas que estiveron traballando -e aínda traballan- en zonas como a da citada parroquia. “Imos aplicar a normativa e pedir responsabilidades ás empresas”, indicou o rexedor local.

“Isto é moi grave e non o podemos consentir”, incidiu o primeiro edil, considerando que Frades se converteu estes días en zona na que se exemplificou unha situación que non é allea a outros puntos do rural estradense. Gonzalo Louzao profundou nos datos rexistrados sinalando que mesmo o coche da Policía Local se viu atrapado polo mal estado das pistas cando tentaba cruzar para que os axentes puidesen realizar o informe solicitado e foi precisa a presenza doutro vehículo para retirar o coche patrulla.

A situación denunciada polo goberno local xurdiu tamén no apartado de rogos e preguntas da sesión plenaria correspondente ao mes de abril. Tras as preguntas do grupo socialista, o alcalde recoñeceu estar ao tanto das incidencias e das súas consecuencias, informando á oposición da que xa se puxeron en marcha os mecanismos para que as empresas asuman a súa responsabilidade e nin os veciños nin o concello sufran os prexuízos dos estragados camiños públicos. Aproveitou Louzao Dono para lanzar un chamamento á cidadanía para que informe ao Concello dos danos que aprecie nas vías pola actividade destas empresas.